Di demeke nêz de av digihîje zeviyên gundê El-Esediye

Komîteya Avdanê ya girêdayî Meclisa Sivîl a Reqayê bi hevkariya Tîma Afirînerên Pêşerojê xebatên sererastkirina pergala avdanê ya gundê El-Esediye ya ku 10 hezar hektar zevî av dide, didomîne. Li gorî çavdêrên projeyê, di çend rojan de dê proje bi dawî bibe.

4 sibat, 2019 08:21

REQA

Bi armanca kontrolkirina herikîna ava avdanê û birêxistinkirina wê, Komîteya Avdanê û Tîma Afirînerên Pêşerojê xebatên sererastkirina sazkera avdanê ya gundê El-Esediye li bakurê gundewarên Reqayê dimeşîne.

Sazker 26 yek ji mezintirîn sazkerên qenaya El-Sehlebiya Jêrîn tê hesibandin. Ji ber ku çeteyên DAIŞ`ê mayin lê çandibûn, beriya ku ji herêmê birevin bi temamî hatibû rûxandin.

Sazker 10 hezar hektar zevî av dide. Ava wê digihîje 9 gundên derdorê; Hitîn, El-Ednaniye, El-Esediye, El-Ysifiye, El-Nesîm, El-Qehtaniye, Yarub û El-Himêrat.

Proje dê di demekê de ku 10 rojan derbas neke, bi dawî bibe û dê derdora 20 hezar şênî û cotkarên Reqayê jê sûdê wergirin.

Endezyarê rêveber ê projeyê Ebdulqadir El-Elî girêdayî projeyê ev tişt anî ziman: "Ji ber paşdeçûna çandiniyê li gundewarên Reqayê, me mezintirîn sazkera avdanê ya gundewarên Reqayê kir armanca xebatên xwe. Ji 40 rojan ve em di vê projeyê de dixebitin û hindik maye ku bi dawî bibe."

Ebdulqadîr El-Elî destnîşan kir ku proje gelekî girîng e lê rewşa hewa bandor li bidawîkirina projeyê kir û wiha pê de çû: "Sazker li ser qenayeke mezin a avdanê hatiye bicihkirin. Herikîna avê ya nebirêxistinkirî zirar bi zeviyan û cotkaran dikir.”

Hêjayî bibîrxistinê ye ku Tîma Afirînerên Pêşerojê bi hevkariya Komîteya Avdanê ya Meclisa Sivîl a Reqayê, projeyeke bi navê `Sewacî El-Xêr` li gundê El-Sehlebiyê pêk anîbû. Di projeyê de qenaya El-Sehlebiyê û Harûn El-Reşîd ên ku 17 hezar donim zevî li gundewarên rojava ava didin, sererast kirin.

(şx)

ANHA