‘Heke Tirkiye destê xwe ji herêmê bikişîne dê aştî pêk were’

QAMIŞLO

Şêniyên herêma Dêrikê sersaxî ji malbatên 2 şervanên YPG`ê Mezlûm Çîmen (Çekdar Rêdûr) û Wanî Malay (Şikir Amed), şervana YPJ`ê Sungul Aktî (Hîra Viyan Amed) û şervanê QSD`ê Xalis Mihemed (Alan Merzûqa) re xwest. Konê sersaxiyê li navçeya Til Koçber cihê jidayikbûna şehîd Alan Merzûqa hate vedan.

Di konê sersaxiyê de wêneyên şehîdan, alên YPJ, YPG û QSD`ê hatin daliqandin.

Fermandarê YPG`ê Şengal Til Koçer di merasîmê de axivî, sersaxî ji malbatên şehîdan re xwest û wiha anî ziman: "Em sersaxiyê ji bo malbatên şehîdên xwe û hemû hevrêyên xwe yên li eniyên şer dixwazin. Wekî ku Rêberê Gelê Kurd Abdullah Ocalan gotiye şehîdên me pêşengên me yên manewî ne. Em soz didin ku em ê heta dawiyê şopdarên rêya wan bin û parastina destkeftiyên ku bi saya wan hatine bidestxistin, bikin."

Fermandar Şengal got Tirkiye tevliheviyê li hemû deveran derdixe, îro jî îdia dike ku ew ê “herêmeke ewle” li Bakur û Rojhilatê Sûriyê ava bike û wiha dawî li axaftina xwe anî: "Em ji wan re dibêjin heke hûn destê xwe ji herêmên me bikişînin, dê aştî û aramî li her derê çêbe."

Paşê bi navê meclisa navçeya Girkê Legê, bi navê Meclisa Til Koçer, Kongreya Star û PYD`ê axaftin hatin kirin. Di axaftinan de sersaxî ji malbatên şehîdan re hat xwestin û soza şopandina rêya şehîdan û berxwedana li dijî dewleta Tirk a dagirker hat dayîn.

Paşê wesîqetên şehîdan hatin xwendin û radestî malbatên wan hatin kirin. Merasîm bi dirûşmeyên “Şehîd namirin” bi dawî bû.

(bx)

ANHA