Cenazeyê şehîd Mihemed Leylî li Til Hemîsê hate veşartin

QAMIŞLO

Bi sedan şêniyên navçeya Til Hemîsê ya kantona Qamişlo cenazeyî şervanê YPG‘ê Mihemed Leylî ê 7‘ê Çileyê di Pêngava Bagera Cizîrê de şehîd bibû ji navenda Meclisa Malbatên Şehîdan a taxa Enteriyê ya bajarê Qamişlo wergirtin û ber bi goristana şehîdan a navçeya Til Hemîsê ve ketin rê.

Li goristana şehîdan a navçeyê ji bo bîranîna cangoriyên azadiyê deqeyeke rêz hate. Ji fermandarên QSD‘ê yên navçeya Til Hemîsê Kemal Pîr axivî û soza şopandina rêya şehîdan dan. Kemal Pîr got: "Şehîd Mihemed Leylî ne şehîdê yekemîn e û ne jî yê dawî ye, ji bo parastina welêt û destkeftiyên bi xwîna şehîdan hatin bidestxistin em hemû fedayî ne."

Fermandarê QSD‘ê Kemal Pîr di dawiya axaftina xwe de banga hevgirtinê li gelê herêmê kir.

Di berdewama merasîmê de endamê Meclisa Malbatên Şehîdan Mihemed Xilêwî axivî û ev tişt got: "Her kes pêşketinên siyasî dişopîne, her kes dibîne ku hêzên derve ji bo berjewendiyên xwe mudaxeleyên herêmên me dikin, ji bo rêgirtina li ber van planan gelê me xwe di nava Hêzên Sûriyeya Demokratîk de bi rêxistin kirine û bê westandin tê dikoşin. Bi saya şehîdên qehreman me teror tine kir û bi azadî dijîn."

Hevserokê Meclisa navçeya Til Hemîsê Salih El-Xelef jî şehîd Xebat Dêrik ku ji damezrînerên YPG‘ê bi bîr anî û sersaxî ji malbatên şehîdan re xwest.

Piştî axaftinan Hevserokê  Meclisa Malbatên Şehîdan Ehmed El-Ebawî nasnameya şehîd xwend û radestî malbatê kir.

Cenazeyê şehîd di nava dirûşmeyên "Şehîd Namirin" hate veşartin.

(dh)

ANHA