Şanoya dîroka Minbicê tê amadekirin

SELWA EBDULREHMAN - ŞÎLAN MIHEMED / MINBIC

Komîteya Çand û Hunerê ya Minbicê dest bi amadekirina şanoyeke dîrokî bi navê 'Destana El-Hîro Polîs a pîroz' kir. Şano qala dîroka bajarê Minbicê ya 2 hezar salî heta bigihîje dewleta El-Hemedanî di serdema hikmê Seyf El-Dewle El-Hemedanî de ya Helebê dike. Di wê demê de Seyf El-Dewla El-Hemedanî kurê Minbicê helbestê Ebû Fîras El-Hemdanî wek emîrê Minbicê erkdar dike.

Xebata dîroka şaristanî ya Minbicê, cihêrengiya pêkhateyên Minbicê ji berê ve, giyana biratiya gelan û hevgirtina gelên bajêr li hember êrîşên ku rastî bajêr hatine vedibêje. Her wiha di şanoyê de hindek şerên şêniyên Minbicê li dijî Rûm û gelek şaristaniyê din bi bîr dixe. Armanca şanoyê ew e ku girîngiya yekgirtina gelên herêmê li hember gefan û planên metîngeriyê ji şêniyan re şîrove bike. Her wiha ji bo şênî sûd ji dîroka bav û kalanên xwe di hevgirtinê de ji bo bidestxistina destkeftiyan bigirin.

Hejmara lîstokvanên şanoyê 50 lîstokvanan derbas dike û temenên wan di navbera 7 heya 45 saliyê de ne. Piraniya beşdaran ji Komîteya Perwerde û Fêrkirinê, Ciwan, Yekitiya Werzîş û Mamoste ne.

Piştî temamkirina pêdiviyên şanoyê ji dekor, cil û amûrên pêwîst, endaman dest bi projeyan kirin.

Girêdayî mijarê cîgira Komîteya Çand û Hunerê Zor Ishaq ji ajansa me Hawarê re axivî û wiha got: "Ruxmî şert û mercên ku bajar tê re derbas dibe, me însiyatîf girt û me dest bi amadekirina vê xebatê kir. Armanca me ew e ku em şêniyan bi dîroka Minbicê ya kevnar û yekitiya gelên herêmê ji hezaran salan ve li hember êrîş û gefan, parastina bajarê xwe kirine, bi bîr bixin."

Zor destnîşan kir ku gerînendeya şanogehan a Komîteya Çand û Hunerê ji du mehan ve dest bi amadekirina xebata bi navê Destana Hîro Polîs a Pîroz kiriye. Her wiha tê payîn ku amadekarî 3 mehên din bidome.

Zor da zanîn ku şano tenê dê carekê bê pêşandan û dema wê derdora saetek û nîv e.

Derhênerê şanoyê Ehmed Şihazê jî wiha got: "Ev xebateke mezin û dîrokî ye. Lîstikvanên wê bi temenên cuda ne. Şano qala dîroka Minbicê û di dirêjahiya dîrokê de, hevgirtina şêniyên wê li hember êrîşan dike. Em bi hêvî ne ku ev xebat bi ser bikeve û ji bo pêşxistina şanoyê li Minbicê bibe bingehek.”

(şx/bm)

ANHA