Çalakiya greva birçîbûnê ya jinên Efrînê didome

ŞEHBA

Kongreya Star a Efrînê bi armanca şermezarkirina tecrîdkirina Rêberê Gelê Kurd Abdullah Ocalan û piştiriya çalakiya greva birçîbûnê ya hevseroka KCD`ê û parlementera HDP`ê ya bajarê Culemerg ê bakurê Kurdistanê Leyla Guven duh li gundê Babinis ê Şehbayê dest bi çalakiya greva birçîbûnê kir. Roja destpêkê 60 jinên Efrînê tev li çalakiyê bûn.

Îro jî roja duyemîn a çalakiya greva birçîbûnê bi tevlêbûna 70 jinên ji hemû pêkhateyên Efrînê didome.

Di çalakiyê de yek ji rêveberên Kongreya Star a navçeya Fafînê Selwa Ehmed, hevseroka Yekitiya Êzidiyan Sûad Heso, bi navê Meclisa Malbatên Şehîdan a Efrînê Şaziya Îbrahîm û bi navê Meclisa Malbatên Şehîdan a Şehbayê Mihemed Welo axaftin hatin kirin.

Di axaftinan de hate destnîşankirin ku ew ê heta dawiyê li dijî zilm û zordariya Erdogan destekê bidin hemû jinan, her wiha soz da ku dê ji bo azadî, rizgarkirin û avakirina civakeke demokratîk û ewle heta dawiyê li ber xwe bidin û bang li dewleta Tirk a dagirker kirin ku tecrîdê li ser Rêberê Gelê Kurd Abdullah Ocalan rakin, ji ber ku projeya wî mînaka çareserkirina aloziya herêmê ye.

Her wiha êrîşên dewleta Tirk a dagirker li ser xaka Sûriyê û destekdayîna wê ji çetyên DAIŞ`ê re şermezar kir û destnîşan kir ku dê heta dawiyê li dijî zilmê bisekinin, tu carî ji biryarên Erdogan û alîgirên wî natirsin, dê heta dawiyê li ber xwe bidin û dê çalakî û xwepêşandanên xwe berdewam bikin. 

Tê payîn ku çalakî sibê were bidawîkirin.

(bx)

ANHA