Rojên batlaneyê kirine jêdera pêşxistina şarezahiyên zarokan

TOLÎN HESEN – SOLÎN REŞÎD / ŞEHBA

Li gel berxwedana şêniyên Efrînê li kantona Şehbayê, Tevgera Çand û Hunera Demokratîk roleke sereke ji bo vegerandina giyanê hunerî di nav zarokên Efrînê de lîstiye û rê li pêşberî wan vekiriye. Tevgerê hefteyê du rojan ji bo hînkirina zarokan warên cuda yên hunerî ji govend, stran, şano, lêdana amûrên muzîkê û wênesaziyê diyar kirine û dewreyan di nav kon û malan de li gund û navçeyên kantonê dimeşîne.

Komîteyên tevgerê li gundê Ûm El-Hoş û navçeya Ehrezê 116 zarok ji hemû temenan hembêz dike. Zarok perwerdeyên xwe di rojên În û Şemiyê de dibînin, ji ber ku piraniya rojên din diçin dibistanê.

Li gel hindek zarokan zêdetirî şarezayiyekê heye, komîte rê ji wan re vedike û zarok di heman demê de tev li komên govend û stranan dibin.

Girêdayî mijarê zarokê bi navê Hesen Nasêr ê 12 salî ku di koma stranan de ya navçeya Ehrezê ye, wiha got: "Ji ber hezkirina me ji hunerê re, em çanda xwe fêr dibin. Exlaq tê wateya çand û hunerê, ji lew re divê em xwe bi pêş bixin."

Ji aliyê xwe ve berpirsa Komîteya Çand û Hunerê ya navçeya Ehrezê Sara Mistefa destnîşan kir ku dema şêniyên Efrînê di encama êrîşan de naçar man ji warên xwe derkevin û li Şehbayê bi cih bûn, tevgerê ji bo ku rewşa şer bandorê li zarokan neke û çanda xwe ji bîr nekin, destpêkê komîte li gund û navçeyên Şehbayê ava kirin.

Ji 3 mehan ve Komîteya Çand û Hunerê ya Ûm El-Hoş ruxmî derfetên kêm dixebite. Gelek xwendekar tev li xebatên komîteyê dibin. Heta niha 66 endamên komîteyê ji zarok û mezinan hene. Her çi qas hejmara endaman pir bibe, komên nû tên avakirin. Piraniya endamên komîteyê ya Ûm El-Hoş ji wênesaziyê hez dikin. Tevî xebatên hunerî li navenda komîteyê waneyên zimanê kurdî tên dayîn. 

Ji aliyê xwe zaroka bi navê Zîlan Birîm endama 'Koma Serdem' a gundê Ûm El-Hoş diyar kir ku di rojê de 2 saetan perwerdeyên xwe dibînin û wiha domand: "Em hewl didin bi hev re li ser stranan bixebitin û bi vê rêbazê em ji dijminan re vîna xwe ya xurt xuya dikin ku her çi qas hewl bidin me biçewisînin, lê wê nikaribin. Em ê çanda xwe biparêzin û bi pêş bixin û dê kesek nikaribe me asteng bike."

Zîlan destnîşan kir ku ji bo vejandina navê 'Berxwedana Serdemê' li her derê wan navê 'Serdem' li koma xwe kiriye.

Girêdayî heman mijarê endama rêveber a Tevgera Çand û Hunerê Xedîce Xelîl tekez kir ku armanca wan ji vekirina navendê ew e ku alîkariya nifşên nû bikin da ku şerê taybet derbas bikin û bi taybet ciwanan. Her wiha ji bo piştgiriya derûniya wan bikin ku di encama derketina ji Efrînê de, rû daye.

(şx)

ANHA