Çîroka Hudayê azarên jinan ên di dema DAIŞ'ê de derpêş dike

FADÎ FARÛQ - BETÛL EL-ŞÊX / DÊRAZOR

Di dirêjahiya aloziya Sûriyê û dema dagirkirina xaka Sûriyeyê de ji hêla çeteyên DAIŞ'ê ve, şêniyên herêmê rastî gelek binpêkirin û azaran hatine. Di her malekê de çîrokek êşbar û xemginiyê heye. Çîroka Huda El-Hesen yek ji hezaran çîrokên şêniyên bajarê Dêrazorê ye.

Huda 18 salî ye û ji şêniyên gundê El-Seiwa yê gundewarê Dêrazorê ye. Malbata Huda ji 10 endaman pêk tê. Huda di encama teqînekê de ku li nêzî mala wan pêk hatiye, çavê xwe winda kiriye û ji ber tunebûna bijîşkan û kadroyên tenduristiyê  û ji ber binpêkirinên DAIŞ'ê azarên wê zêdetir bûne. Niha rûyê Hudayê çelexwarî bûye û bûye qurbaniyeke çeteyên DAIŞ'ê.

Bi paşguhkirina rêxistinên mirovî re rewşa Hudayê her ku diçe xirabtir dibe. Huda serpêhatiya xwe ji ajansa me re parve kir û wiha got: "Tevî malbata xwe ez li malê rûniştibûm, dema dengê teqînê hat, hema yekser ez çûm derve binêrim ka çi qewimî. Lê min tiştek ji bilî tozê nedît û tenê dengê cîranan hat guhê min ku ji min re dibêjin ku parçeyek ji teqînê derbasî çavê min bûye."

Huda wiha domand: "Çeteyên DAIŞ'ê dema li herêmê bûn, destûr nedidan kadroyên tenduristiyê bixebitin. Her wiha derketina şêniyan derveyî herêmê bi armanca dermankirinê qedexe dikirin. Ji ber wê ez wisa mam û derdora çavê min çelexwarî bû."

Huda bang li rêxistinên mirovî kir ku rewşa wê di ber çavan re derbas bikin û alîkariya wê bikin.

Ji aliyê xwe ve  xwişka Hudayê Firyal El-Hesen destnîşan kir ku çeteyên DAIŞ'ê herêm wêran kir û şênî ji bicihanîna jiyana xwe ya asayî bê par hiştin û diyar kir ku çîroka xwişka wê, yek ji hezaran çîrokên êşkişandinê yên şêniyên herêmê ye.

(şx)

ANHA