‘Bi kuştina mirovekî fikr nayên kuştin’

XALID EL-CUMA - HEMED EL-MISTEFA / REQA

Têkildarî hewldanên têkbirina ewlehî û aramiya herêmên nû hatine rizgarkirin, hejmarek hiqûqnasên bajarê Reqayê nêrînên xwe ji ajansa me re parve kirin.

Parêzer Abdullah El-Eryan got her projeyek siyasî ku muxalifên wê nebin wê dijimên wê hebin, bûyerên kuştin û teqîn û hedefgirtina sembolên civakî mîna şêxên êlan an jî leşkeran tenê bi armanca derxistina tevliheviyê di navbera gelên herêmê de û bi taybet êlan pêk tên.

Abdullah El-Eryan got: "Em ê li hember dijminên ku hewl didin projeya demokratîk û Rêveberiya Xweser têk bibin bisekinin. Ji ber ku ev cara yekê ye ku gel xwe bi xwe rêve dibe."

Di berdewama gotinên xwe de El-Eryan destnîşan kir ku dewletên hewl didin fîtneyan belav bikin wê negihîjin armancên xwe û wiha got: "Bi hedefgirtina kesayetekî fikrên wî dimîne. Em ê xebatên xwe berdewam bikin ku porjeya xwe ya biratiya gelan û jiyana hevbeş bi pêş bixin."

Ji aliyê xwe ve parêzer Hesen Mihemed anî ziman ku bûyerên li herêma Reqayê û herêmên ku nû hatine rizgarkirin, ne bi tişekî nû ye û wiha pê de çû: "Bûyerên ku li Reqayê û li herêmên ku nû hatine rizgarkirin rû didin, ew encama berxwedana şêniyên Reqayê û QSD'ê ye, piştî qewrandina terorê ji Reqayê. Ev komên terorîst armanc dikin ku fitneyan di navbera gelên herêmê de derxin."

Her wiha Hesen Mistefa bal kişand ku bajarê Reqayê di nav aramî û ewlehiyê de ye û bi taybet piştî rizgarkirina wê ji ajandeyên dewletên derve mîna Tirkiye û bermahiya wê DAIŞ'ê ku hewl dide fitneyan di navbera gelên herêmê de biçîne. Çeteyan ne tenê leşker lê belê sivîl û sembolên civakî mîna şêxê êla El-Efdalê Beşîr El-Hiwêdî kirin hedef.

Di dirêjahiya gotinên xwe de Mistefa diyar kir ku Reqa nimûneyeke nû tê hesibandin û wiha got: "Ajandeyên derve hewl didin vê nimûneyê têk bibin. Lê em ji wan re dibêjin hûn ê nekarin vîn û israra me di avakirina bajarê xwe de li ser bingeha neteweya demokratîk bişikînin."

Girêdayî heman mijarê hevserokê Meclisa Sivîl a Reqayê Mişleb El-Derwîş wiha got: "Di van demên dawîn de gelek rojên dijwar di bajarê Reqayê re derbas dibin. Piştî pêşketinên ku li bajêr di hemû warên siyasî û leşkerî de û hevgirtina gelê herêmê di bin banê Rêveberiya Xweser de pêk hatine, ajandeyên derve hewl didin fitne û tevliheviyê di navbera hemû pêkhate û neteweyên bajêr de derxin."

Her wiha El-Mişleb teqez kir ku ajandeyên derve yên ku pêşketinên herêmên nû hatine rizgarkirin, dişopînin wekî Minbic, Reqa û Tebqayê. Ev ajande hewl didin bi destê xiyanetê û bi alîkariya kesên bêçare aramî û ewlehiya wan herêman bihejînin.

Hevserokê Meclisa Sivîl a Reqayê Mişleb El-Derwîş di dawiya axaftina xwe de bi bîr xist ku hemû gotegotên ku çapemeniyên derve li ser bajarê Reqayê derdixin, ne di cih de ne û got armanc ji van gotegotan reşkirina sîstema herêmê ye.

(şx)

ANHA