Li kampên Şehbayê sobe hatin belavkirin

Bi hatina zivistanê re meclisên 4 kampan ku şêniyên Efrînê lê bi cih bûne, 2 hezar sobe li koçberan belav kirin.

12 mijdar, 2018 08:11

ŞEHBA

Bi hezaran şêniyên Efrînê 18'ê Adarê di encama dagirkirina Efrînê ji hêla artêşa Tirk a dagirker û çeteyên wê ve neçar man ji malên xwe derkevin û niha li 4 kampên li kantona Şehbayê; Serdem, Berxwedan, Şehba û Efrînê bi cih bûne.

Bi hatina zivistanê re rêveberiyên her 4 kampan tedbîrên hişyariyê ji bo bahoz û baranên zivistanê girtin. Ji her konekî re hejmarek turên çîmento û kelpîç belav kirin da ku konên xwe amade bikin.

Piştî sarbûna hewayê, rêveberiyên her çar kampan, 2 hezar sobe û miqdarek mazot bê pere ji her malbatekê re belav kir.

Têkildarî mijarê endama rêveber a Kampa Berxwedan Elîfe Hana diyar kir ku aliyê tekane alîkariyan li şêniyan belav dike, Rêveberiya Xweser e û wiha domand: "Ruxmî derfetên kêm ên rêveberiyê lê dîsa jî alîkariyan li şêniyan belav dike."

Di dawiyê de Elîfe destnîşan kir ku hewa li kantona Şehbayê sar bûye û wiha got: "Ji ber wê me sobe û miqdarek mazot li şêniyan belav kirin."

(şx)

ANHA