Kargeha hesin derfetên kar li Reqayê peyda dike

HEMED EL-MISTEFA - FECIR EL-XALID / REQA

Kargeha jinûvebikaranîna hesin a ku dikeve rojavayê bajarê Reqayê, bi armanca peydakirina derfetên kar û bicihanîna daxwazên herêmê ji hesin, piştî 5 salan ji nû ve hate vekirin.

Kargeh girêdayî Maliya Giştî ya bajarê Reqayê dixebite. Hesin ji avahiyên giştî yên ku bi temamî wêran bûne tê komkirin û radestî kargeha hesin tê kirin. Kargeh miqdara hesinê komkirî, bi rêya alavan tîne rewşa ku ji nû ve were bikaranîn.

Hêza hilberînê ya kargehê ya rojane di navbera 5-8 tonan de ye. Ji aliyê aborî û malî ve kargeh nirxên hesinê ku ji derve tê, bi qasî ji sedî 20 kêm kiriye. Her wiha kargeh bi hewcedariya derdora 40-50 karkeran, fenî û kadroyek di xebitandina alavan de pispor heye.

Çavdêrê kargehê Mistefa El-Ebid li ser rola kargehê û girîngiya wê axivî û wiha got: "Ji ber ku piraniya kargehan an hatine talankirin û wêrankirin û yan jî xwediyên kargehan, karker û kesên xwedî tecrube koçber bûne. Îro tevgera avahîsaziyê li Reqayê geş bûye û daxwazên madeyên avakirinê zêde bûne."

Têkildarî karê kargehê Mistefa wiha got: "Bi armanca sivikkirina barê firoşkaran û kesên ku hesin dikirin, peydakirina miqdara hesin ji bo xwediyên dikanên firotina hesin û bicihanîna daxwazên herêmê ji hesin, em bi koordîneya Maliya Giştî ya Reqayê re dixebitin." Her wiha destnîşan kir ku bi vê gavê kargehek derfetên kar peyda dike û dibe sedema vegera kesên xwedî tecrube da ku sûd ji karînên wan bê wergirtin.

Di dawiyê de Mistefa wiha got: "Tê payîn ku hejmara werşeyên ku li kargehê dixebitin zêde bibe û amadekariya vekirina beşeke nû ji bo zêdekirina hilberînê heta bigiîje rojane zêdetirî 8 tonan, tê kirin."

(şx)

ANHA