Di encama teqîna mayineke dagirkeran de malbatekê jiyana xwe ji dest da

Malbateke ji Efrînê ku ji dê, bav û zarokekî yek salî pêk tê, dema dixwest ji ber hovîtiya dagirkeriya Tirkiyeyê û çeteyên wê ji Efrînê derkeve, mayineke çeteyan pê ve teqiya û her sêyan jiyana xwe ji dest da.

NÛÇE

23 cotmeh, 2018 07:22

EFRÎN

Çavkaniyên herêmî ji ajansa me ANHA`yê re diyar kir ku şêniyê bi navê Mihemed Farûq Bîro (28), hevjîna wî Tolîn Rêzan (21) û kurê wan Can Mihemed Bîro (1) duh dema dixwest ji ber hovîtiya artêşa Tirk a dagirker û çeteyên wê ji Efrînê derkevin, di encama teqîna mayinekê li ser rêya di navbera Efrîn û Beradê de jiyana xwe ji dest da.

Çavkanî destnîşan kir ku malbat ji gundê Şêxurzê yê girêdayî navçeya Bilbilê ya Efrînê ye û li Efrînê dima. Werşeyeke wan a belavkirina cilan hebû û debara xwe pê dikirin. Artêşa Tirk a dagirker û çeteyên wê derfet neda Mihemed Bîro ku di werşeya xwe de kar bike, heta ku ew neçar kirin ku 2 milyon lîreyên Sûriyeyê bide wan.

Lê tevî wê jî her roj çeteyan ew tengav dikir û bac jê dixwestin û gef lê dixwarin. Ji ber wê Mihemed Bîro neçar ma ku ji ber hovîtiya dagirker û çeteyên wan ji Efrînê bireve. Dema ku ji Efrînê derdiketin li ser rêya di navbera Efrîn û gundê Beradê de, di encama teqîna mayineke dagirkeriya Tirkiyeyê û çeteyên wê de, her sê endamên malbatê jiyana xwe ji dest da.

(bx)

ANHA