‘Şehîd Hogir ji bo me bû nîşana biratiya gelan’

STÊRA NEBÎ-ŞÎRÎN MIHÊDÎN / KOBANÎ

Ciwanên Kobanê yên ku di Festîvala Dicle û Firat a Şehîd Hogir de amede bûn, bi coş û kêfxweşiyeke mezin nêrîna xwe der barê festîvalê de anîn ziman.

Der barê mijarê de Endamê YCR`ê Ehmed Derwîş wiha got:"Her sal ev festîval li bajarê Qamişlo tê lidarxistin lê îsal festîval li bajarê Kobanê bi tevlêbûna hemû neteweyên Ereb, Tirkmen, Kurd û Suryan pêk tê û vê yekê hişt ku em pir kêfxweş bibin. Me dît hemû netewe tevî me bûne û her kes çanda xwe di vê festîvalê de pêşkêş dike."

Her wiha ciwana bi navê Ronahî Mihêdîn ku bi coş û kêfxweşî di festîvalê de amede bûbû wiha got: "Em wek ciwan îro dema ku me dît ev festîvala şehîd Hogir li Kobanê tê lidarxistin, em pir kêfxweş bûn û wek ciwan em ê bibin şopdarên şehîd Hogir û hêviya me ew e ku mîhrîcaneke wekî vê her sal li bajarê Kobanê bê lidarxistin."

Li aliyekî din jî ciwanê bi navê Mihemed Ehmed kêfxweşiya xwe wiha anî ziman: "Ez sersaxiyê ji malbata şehîd Hogir re dixwazim. Dema ku me dît her netewe di nav me de ye û her kesî di vê festîvalê de çanda xwe derxist pêş û ji ber vê jî mirov dibîne ku ev festîval çandî ye û şehîd Hogir bû nîşana biratiya gelan."

ANHA