Girê Ecacê... Dîrokeke kevnar ku hatiye wêrankirin

Girê Ecacê yê girêdayî navçeya El-Erîşe ya kantona Hesekê yek ji girîgtirîn cihên dîrokî yên Aşûran li herêmê ye. Ew jî mîna gelek şûnwaran ji hêla DAIŞ'ê ve hatiye talankirin. DAIŞ'ê peyker û nivîsên Mismarî (Mixî) ku temenê wan digihîje hezaran salan, şikandin.

ÇAND Û HUNER

16 cotmeh, 2018 06:47

TELAL HISÊN / HESEKÊ

Kantona Hesekê bi şûnwarên ku dîroka wan vedigere hezaran salan, zengîn e. Lê di dema dagirkeriya DAIŞ'ê li herêmê de, ew cihên dîrokî rastî talan û wêrankirinê hatin. Her wiha çeteyan gelek bermahiyên dîrokî dizîn û firotin dewleta dagirker a Tirk. Girê Ecacê yek ji wan deverên dîrokî ye ku çeteyên DAIŞ'ê peykerên wê yên dîrokê şikandin û gir wêran kirin.

Girê Ecace derdora 50 km ji sînorê Iraqê dûr e. Di serdema 19'an de hate vedîtin. Berhemên wê yên dîrokî ji muzexaneyên Sûriyê û muzexaneyên din re hatin veguhastin. Bermahiyên mayî jî çeteyên DAIŞ'ê tevî qaçaxçiyên herêmê dizîn. Çeteyên DAIŞ'ê ji bo derxistina bermahiyên dîrokî gelek tunel li gir kolandin û dirêjahiya wan gihaşt 20 metreyan.

Şêniyên gundê Ecacê yê girêdayî navçeya El-Erîşê şêwazên ku DAIŞ'ê di vakolînên xwe de li gir vedibêjin.

Hemûd El-Salih destnîşan kir ku dîroka gir vedigere serdema Aşûriyan û gelek gir mîna wê li ser beravên çemê Xabûr hene. El-Salih wiha domand: "Çeteyên DAIŞ'ê gelek peykerên veşartî di bin erdê de vedîtin. Gelek ji wan şikandin û yên mayî bi rêya sînorên Tirkiyeyê firotin."

Di berdewama gotinên xwe de El-Salih diyar kir ku zêdetirî ji sedî 40 ji gir ji aliyê çeteyên DAIŞ'ê ve hatiye talankirin û gelek tunel lê kolandine û wiha got: "Gelek bermahiyên dîrokî ku vedigerin serdema Aşûriyan, ji kokê ve wêran bûn."

Şêniyên gund bang li Desteya Şûnwar û Turîzmê kir ku girîngiyê bidin cihên dîrokî.

Hêjayî bibîrxistinê ye ku Girê Ecacê bi 10 km dikeve bakurê bajarê Şedadê û 50 km başûrê bajarê Hesekê.

(şx)

ANHA