Iraqê bang li civaka navneteweyî kir ku helwesta xwe li dijî destdirêjiyên Tirkiyeyê nîşan bide

NAVENDA NÛÇEYAN

Wezîrê karên derve yê Iraqê  Îbrahîm El-Caferî bang li civaka navneteweyî kir ku bi awayekî micid helwesta xwe li hemberî destdirêjiyên Tirkiyeyê li ser axa Iraqê nîşan bide û di heman demê de gefxwarinên serokwezîrê Îsraîlê li dijî Iraqê red kirin.

El-Caferî di axaftina xwe de ya li pêşiya Konseya Giştî ya Neteweyên Yekbûyî li Newyorkê wiha got: "Me bi fedakariyan welatê xwe rizgar kir. Em ji bo jinûveavakirinê û çespandina saziyên dewletên piştî serkeftina li hemberî DAIŞ'ê dixebitin."

Wezîrê karên derve yê Iraqê destdirêjiyên Tirkiyeyê li ser axa Iraqê red kirin û bang pêwîstiya rêzgirtina ji serweriya Iraqê re kir û got ku di heman demê de Iraq ji bo têkiliyên baş bi Enqereyê re baldar e, lê ev nayê wateya ku destdirêjiyê li serweriya Iraqê  bike.

El-Caferî daxuyaniyên Binyamîn Natanyaho ku îdia dike ku hêzên Îranê di Iraqê de hene red kirin û got ku ew bikaranîna Konseya Giştî li dijî ewlehiya Iraqê qebûl nakin.

El-Caferî diyar kir ku Iraq niha di qonaxeke nû ya demokrasiyê de ye û bang li civaka navneteweyî kir ku sozên xwe yên ji bo jinûveavakirinê pêk bîne.