Li Qamişlo amadekariyên zivistanê hatin nîqaşkirin

Hevseroka kantona Qamişlo têkildarî hatina demsala zivistanê hindek perspektîf dan. Li gorî vê divê hemû proje û bi taybet projeyên îsfeltkirinê bi temamî werin bidawîkirin, amadekariyên demsala zivistanê bi awayekî baş bên kirin û hemû toreyên kanalîzasyonê yên xirabûyî werin sererastkirin.

NÛÇE

17 îlon, 2018 09:13

QAMIŞLO

Hevseroka Meclisa Kantona Qamişlo Perwîn Yûsif bi armanca nirxandina rewşa xizmetguzarî li kantonê bi sedema hatina demsala zivistanê bi hevserok û cîgirên komîteyên xizmetguzariyê re civiya.

Civîn li navenda Meclisa Kantona Qamişlo hate lidarxistin. Di civînê de rewşa şaredariyan di aliyê xizmetguzarî, projeyên ku hatine bidawîkirin û yên ku hîn didomin, hatin nîqaşkirin. Hevseroka Meclisa Kantona Qamişlo Perwîn Yûsif kar û xebatên şaredariyan û derengmayîna wan rexne kir.

Her wiha Perwîn Yûsif destnîşan kir ku pêwîst e komîteyên xizmetguzariyê yên di komînan de werin aktîfkirin, hemû xebatkarên şaredariyê tev li civînên komînên xwe bibin, projeyên ku hê jî nehatine bidawîkirin mîna îsfeltkirin, sererastkirina toreyên kanalîzasyonê û hemleyên paqijiyê werin bidawîkirin.

(bx)

ANHA