Alîkarî ji koçberên Hecîn re tê pêşkêşkirin

EMAR EL-XELEF – DIYAR EHMO / DÊRAZOR

Li herêma Hecînê di navbera şervanên QSD û çeteyên DAIŞ`ê de şerên giran rû didin. Rojane bi dehan şêniyên herêma Hecînê koçber dibin. Ji ber wê Meclisa Sivîl a Dêrazorê kampa Îwa vekir da ku sivîlên koçber dibin, pêşwazî bike.

Meclisa Sivîl a Dêrazorê bi hevkariya Meclisa Sûriyeya Demokratîk (MSD) pêwîstiyên jiyanî wekî xwarin û cil, pêdiviyên tenduristî û cih ji wan re peyda dike. Heta niha zêdetirî hezar çadir belav kirine. Her wiha 15 stêrên ava vexwarinê di hundirê kampê de danîne.

Meclisa Sivîl a Dêrazorê ava vexwarinê li şêniyên gundên Zîban û Xeranîc Şerqî yên ku ji aliyê şervanan ve hatin rizgarkirin, belav dike.

Di vê çarçoveyê de yek ji rêveberên kampa Îwa Mihemd El-Casim got Meclisa Sivîl a Dêrazorê bi hevkariya MSD`ê pêwîstiyên jiyanî û tenduristî ji bo şêniyên ku ji herêmên di bin dagirkeriya çeteyên DAIŞ`ê direvin, pêşkêş dike.

El-Casim destnîşan kir ku roj bi roj hejmara şêniyên bajarokê Hecîn ên berê xwe didin kampa Îwa zêde dibin. Her wiha El-Casim bang li hemû rêxistinên mirovî û navdewletî yên li Bakurê Sûriyeyê kir ku destekê bidin koçberan û di hemû aliyan de alîkariya wan bikin.

(bx)

ANHA