‘Sala perwerdeyê ya nû li herêmên rizgarkirî dê guhertinên mezin bi xwe re bîne’

SEMÎRE DAWÛD-MIHEMED EL-EHMED / GIRÊ SPÎ

Hevseroka Buroya Perwerde û Fêrkirinê ya Meclisa Sûriyeya Demokratîk (MSD) Nesrîn Doko ji ajansa me re li ser mijara amadekarî û plansaziyên buroyê di sala perwerdeyê ya nû de li herêmên nû hatine rizgarkirin wekî Minbic, Reqa, Dêrazor û Tebqayê, axivî.

Buroya Perwerde û Fêrkirinê ya MSD'ê xebatên komîteyên perwerdeyê yên herêmên Minbic, Tebqa, Reqa û gundewarên rojhilatê Dêrazorê dişopîne.

Destpêkê Nesrîn hatina sala perwerdeyê ya nû li xwendekar û mamosteyan pîroz kir û hêvî kir ku ev sal saleke serkeftî be.

Nesrîn wiha domand: "Dewama îdarî ji bo tomarkirina xwendkaran û amadekirina belgeyan di 2'yê Îlonê de dest pê kiriye.”

Di berdewama axaftina xwe de Nesrîn wiha got: "Ji ber ku hejmarek mezin ji xwendekaran berê xwe didin dibistanên herêmên nû hatine rizgarkirin, em dibînin ku îsal ji salên dîtir cuda ye. Hejmara xwendekaran sed hezar derbas dike û ev jî aramiya herêmê îsbat dike."

Her wiha Nesrîn destnîşan kir ku wan ji bo pêşwazîkirina sala perwerdeyê ya nû gelek mamoste amade kirine. Nesrîn diyar kir ku mamoste di dewreyên bîrdozî û materyalan re derbas bûne û wiha domand: "Li gorî derfetên heyî me gelek dibistan li Reqa û Dêrazorê restore kirin."

Hevseroka Buroya Perwerde û Fêrkirinê ya MSD'ê Nesrîn Doko wiha got: "Xema me ya sereke amadekirina dibistan û xwendekaran e. Hejmara mamosteyan 11 hezar e. Hejmara dibistanên seretayî hezar û 50 û yên navîn hezar û 150 dibistan in û bi sed hezaran xwendekar hene."

Li ser stratejiya buroyê ji bo sala perwerdeyê ya nû Nesrîn wiha got: "Em dixwazin gelek xwendekaran pêşwazî bikin û salên tarîtiyê û zilmê bi dawî bikin. Ji bo wê em ê hewl bidin bi rêya kadroya perwerdeyê xwendekaran ji aliyê derûnî û fikrî ve ji perwerdeyê re amade bikin."

Di dawiyê de Nesrîn Doko tekez kir ku girtekên ku buroyê girtine ji bo amadekirina dibistanên navîn û amadehî bi taybet li Tebqa, Minbic û Reqayê gaveke serkeftî ye.

(şx/kc)

ANHA