Li Reqayê ji bo başkirina xizmetguzariyê civînek hate lidarxistin

REQA

Civîn li qada bajarokê El-Hemrat hate lidarxistin. Hevserokê Komîteya Têkiliyên Giştî ya Meclisa Sivîl a Reqayê Ferhan Hac Îsa, endamên rêxistina Înma û hejmareke ji rûspiyên êlên herêma El-Kerame û gundewarên wê tev li civînê bûn.

Di civînê de hevserokê Komîteya Têkiliyên Giştî ya Meclisa Sivîl a Reqayê Ferhan Hac Îsa li ser rewşa siyasî û ewlehiya herêmê axivî. Hac Îsa destnîşan kir ku pêwîst e şênî û rêxistin ji bo başkirina aliyê xizmetguzarî piştî ku çeteyên DAIŞ`ê herêm xistin bin serweriya xwe û binesaziya wê xira kirin, bibin alîkar.

Her wiha serokê rêxistina Înma li El-Kerame Ehmed El-Heşlûm diyar kir ku dê li gundewarên rohilatê Reqayê gelek proje j aliyê Meclisa Sivîl a Reqayê werin lidarxistin her wiha tekez kir ku dê di nava du rojan bê de toreyên avê û stasyonên avdanê yên çandiniyê werin sererastkirin.

Paşê nîqaş der barê kar û xebatên xizmetguzarî û bi taybet li ser kehrebe û stasyonên avdanê yên çandiniyê di zûtirîn dem de hatin kirin.

Di dawiya civînê de rêxistina Înma û werşeya sererastkirina toreyên kehrebeyê soz da ku dê di zûtirîn demê de karê xwe bi dawî bikin da ku kehrebeyê bighînin hemû malên welatiyan û dê dînemoyên avdanê yên çandiniyê jî sererast bikin.

(bx)

ANHA