Rêya Petrolê bi awayekî lezgîn tê sererastkirin

ŞEHAB EL-EMED / QAMIŞLO

Rêya di navbera navçeya Til Hemîs û Til Berek de ji ber rewşa hewayî ya nebaş û ji ber ku erebeyên bar di wê derê re derbas dibin, xira bûbû. Her wiha di demên dawîn de li wê derê gelek qezayên trafîkê çêbûn.

Şaredariya Gel a Til Hemîsê ji destpêka meha Îlonê ve bi awayekî lezgîn dest bi sererastkirina wê rêyê kir da ku çûn û hatin hêsan bibe.

Şêniyên herêmê dibêjin sererastkirina rê bandorê li aliyê aborî dike ji ber ku çûn û hatina madeyan û berhemên çandiniyê ber bi sûkan ve her wiha birina nexweşan ber bi navendên tenduristiyê ve hêsantir dibe.

Di vê çarçoveyê de hevserokê Şaredariya Gel a Til Hemîsê Abdullrehman El-Hadî got Rêya Petrolê li herêmê sereke ye, li wê derê rê xira bûbû û gelek qezayên trafîkê li wê derê çêdibûn, ji ber wê şaredariyê daxwaz ji Desteya Şaredariyan a Kantona Qamişloyê li ser girîngiya wê rêyê kir.

El-Hadî diyar kir ku Şaredariya Til Hemîs ji bo wê rêyê sererast bike, trêksek bi kirê kir. Her wiha El-Hadî destnîşan kir ku ji ber ku ew rê li herêmê sereke ye, Desteya Şaredariyan soz daye wan ku dê wê rêyê sererast bikin û ji nû ve îsfalt bikin.

(bx)

ANHA