Şêniyên Dêrikê sersaxî ji malbata şehîd Rojbîn re xwest

QAMIŞLO

Bi sedan şêniyên navçeyên Girkê Legê, Til Koçer, Çil Axa û herêma Dêrikê berê xwe da bajarê Girkê Legê da ku tev li merasîma îlankirina şehadeta gerîlaya HPG`ê Besna Rema (Rojbîn Dara) bibin ku di 31`ê Tebaxa 2018`an de li Herêmên Parastina Medyayê şehîd bûbû.

Konê sersaxiyê li bajarê Girkê Legê hate vedan. Konê sersaxiyê bi wêneyên Rêberê Gelê Kurd Abdullah Ocalan, alên TEV-DEM û Meclisa Malbatên Şehîdan û alên YPJ/YPG`ê hate xemilandin.

Şêniyên herêma Dêrikê, navçeyên wê, nûnerên deste û saziyên Rêveberiya Xweseriya Demokratîk û Rêveberiya Sivîl, şervanên YPJ/YPG`ê û hêzên Asayîşê û Parastina Civakî tev li merasîma sersaxiyê bûn.

Merasîmê bi rêzgirtinê dest pê kir. Paşê yek ji fermandarên YPG`ê Ebûd Çiya axivî û sersaxî ji malbata şehîd re xwest û got bi saya têkoşîn û berxwedana şehîdan herêm ji çeteyan hate rizgarkirin.

Her wiha axaftin lin ser navê Meclisa Herêma Dêrikê, Meclisa Til Koçerê û Kongreya Star hatin kirin û sersaxî ji malbata şehîd re hate xwestin.

Dayika şehîd Rojbîn, hevseroka Meclisa Herêma Dêrîkê Zelfa Bedro axivî û got ew şehadeta keça xwe li hemû şehîdan û li Rêberê Mirovahiyê Abdullah Ocalan pîroz dike û destnîşan kir ku ew amade ye ji bo azadiya axa welatê xwe hemû zarokên xwe bike qurban.

Paşê wesîqeta şehadetê hate xwendin û radestî malbata şehîd hate kirin. Merasîma sersaxiyê dê heta saetên êvarê berdewam bike.

(bx)

ANHA