Şêniyên Helebê rûxandina goristanan şermezar kir

Şêniyên Helebê ku serdana goristana şehîdan a li Qada Şehîd Ebû Şiyar kir, xerabkirina goristanên şehîdan ji aliyê artêşa Tirk a dagirker ve şermezar kir û soza rizgarkirina Efrînê careke din nû kir.

NÛÇE

21 tebax, 2018 08:04

HELEB

Bi boneya roja yekê ya cejna Qurbanê, bi sedan şêniyên ji bajarê Helebê tevî şervanên xwe, berê xwe da Qada Şehîd Şiyar a taxa Seken Şebabî ku gorên hin şehîdan lê ne.

Li qadê, piştî deqeyeke rêzgirtinê, bi navê Meclisa Malbatên Şehîdan Îtan Reşo û bi navê Fermandariya Giştî ya YPG`ê Ziyad Xemgîn axaftin kirin.

Di axaftinan de hate gotin ku şehîdan bi rihê xwe rêya azadiyê ji gel re vekir û bi saya wan îro şoreş gihaşt vê astê. Her wiha di axaftinan de soz hate dayîn ku ji bo rizgarkirina Efrînê ew ê her tiştî bikin û wê careke din dayik serdana gorên keç û xortên xwe yên şehîd bikin.

Piştî axaftinan, gel cejna hev pîroz kir û hêvî kirin ku cejna sala tê bibe cejna serkeftina li dijî zalim û dijminan.

Dayikên şehîdan jî ji ajansa me re axivîn û rûxandina goristanên şehîdan li Efrînê ji aliyê artêşa Tirk a dagirker û çeteyên wê ve şermezar kirin.

Dayikan ji rêxistinên mafên mirovan û hiqûqî xwest destwerdanê bikin û sînorekî ji kiryarên bêexlaqî der heqê goristanên şehîdan de, deynin.

(kc)

ANHA