Til Koçer kevneşopiyên berê dişkîne

SEYDO ÎBO-LÎNA CANGÎR/QAMIŞLO

Li bajarokê Til Koçer gelek êl; El-Şumar, Cewalî, Şarbî, Benî Sebi, El-Raşid, Cebûrî, El-Tayî û El-Hedîdî û tevî hejmarek malbatên kurd lê dijîn. Rola çand û hunerê li bajarok di dema rêjîmê de hatibû paşguhkirin û di dema Cebhet El-Nusra de bi temamî hat rewastandin.

Piştî rizgarkirina şervanên YPG û YPJ'ê di 26'ê Cotmeha 2013'an de bajarok ji çeteyên Cebhet El-Nusra, meclisên herêmî û komîteyên xedemî ji bo ji nû ve vejandina bajarok hatin avakirin.

Yekemîn navenda çand û hunerê

Navenda çand û hunerê di dawiya sala 2016 'an hate vekirin. Navend ji bo vejandina çand û hunera erebî û her wiha çînên cuda yên gelên bajarokê bi rêxistin kir.

Di hevpeyvîneke bi ajansa Hawarê re mamosteyê şanoyê yê Navenda Çand û Hunerê ya Til Koçer Ednan Mistefa destnîşan kir ku ev navend di dîroka bajarokê de ya yekemîn e û wiha got: "Ev gav ji bo bajarok li ser her du astan a hunerî û çandî, wekî gaveke dîrokî ye. Ji ber ku tu navendeke çandî li bajarok tune bû."

Qalibên êlan û zehmetî

Li gorî endamê rêveber ê Navenda Çand û Hunerê ya Til Koçerê Mezlûm Elî got ku şêniyên bajarokê ji ber qalib û kevneşopiyên êlan û bandora ola îslamê li ser wan, şerm dikir ku zarokên xwe bişînin navendê û wiha got: "Niha piştî keda endamên navendê bi rêya lidarxistina civînan û serdana malên şêniyên bajarok, şêniyan ew qalib şikandin û niha hêdî hêdî serdana navendê dikin."

Avakirina komên çandî... rêjeya keçan ji ya xortan pirtir e

Navend ji destpêka avabûna xwe de 134 endam bi rêxistin kirin, kom ji wan ava kirin û wiha belav kir: Koma Zarokên Aştiyê 100 zarok di nav de şano, stran, govend. Koma Ş. Uqab a govendên gelêrî 10 ciwan. Koma El-Cezîrê ya stran û govendê 13 ciwan. Koma Ş.Ezîz a şano 11 kes di nav de 6 jin.

Her wiha Mezlûm Elî û rêveberê Koma Ş. Uqab Şengal a govendên gelêrî Mişel Hisên got ku wan ji bo vejandina çand û hunera erebî ya kevn û parastina wê ji windabûnê dixebitin û destnîşan kirin ku ji ber wê wan gelek govendên weke (çopî çolaqî, debkê ereban) û her wiha govendên gelêrî yên kevn di beşdarbûna wan a li şahiyan de pêşkêş kirin. 

Her wiha navend ji bo pêşxistina arezoyên hunerî li gel endaman, dewreyên perwerdê yên teorî û piratîk ji şêwazên hunerî weke nîgar, karê destan vedike. Her wiha navend ji bo zarokên asta seretayî di havînê de dewreyên perwerdê ji bilindkirina asta wan a çandî vekir.

Endamê rêveber ê navenda Mezlûm Elî diyar kir ku rêjeya tevlêbûna jinan a navendê ji rêya xortan ji sedî 60 zêdetir e. Li ser pergala perwerdekirina koman, Elî got ku her komek di hefteyê de 3 caran li gorî beşa xwe perwerde dibe.

Stranek ji zarokên Til Koçerê ji zarokên Efrînê re

Ji bo pêkanîna yekgirtina gel li Bakurê Sûriyeyê li gorî bingeha jiyana hevbeş û biratiya gelan, Koma Zarokan a Aştiyê li ser strana bi navê "Efrîn ji te re aştî" perwerde dibin. Koma zarokan vê stranê diyarî berxwedana serdemê û şêniyên Efrînê dikin ên ku li hember artêşa tirk û çeteyên wê di nav 58 rojan de bi lehengî li ber xwe dane, dikin. Koma zarokan strana xwe di Mîhrîcana Zarokan a ku piştî çend mehan li ser asta Cizîrê were lidarxistin dê pêşkêş bike.

(şx/ew)

ANHA