Deryaya Spî bûye cihê mirina penaberan

Li Îtalyayê hikumeta nû piştî ku dest bi kar kir, tedbîrên dijwar girtin û polîtîkayên Yekitiya Ewropayê yên li dijî penaberan bûn sedem ku rêjeya mirina penaberan a li Deryaya Spî di salên dawîn de zêde bibe.

28 tîrmeh, 2018 06:50

NAVENDA NÛÇEYAN

Li gorî daneyên Komîseriya Bilind a Penaberan a Neteweyên Yekbûyî (UNHCR) ji sala 2015’an ve hejmara penaberan a bi ser Deryaya Spî re ji bo Ewropayê kêm bûye û rêjeya kesên jiyana xwe ji dest dane berevajî wê zêde bûye.

Li gorî vê 1 milyon û 15 hezar penaber di sala 2015’an de ji Deryaya Spî û Egeyê derbasî welatên Yekitiya Ewropayê (YE) bûn û di sala 2016’an de nêzî 363 hezar kêmtir bû. Ev hejmar di sala 2017’an de bû 172 hezar û îsal derdora 55 hezaran e.

Lê berevajî vê rêjeya kêmbûnê, rêjeya mirinê ya li Deryaya Spî û Egeyê zêde bû. Di sala 2015’an de nêzî milyonek penaberên ku Deryaya Spî û Ege derbas kirin, ji wan ji sedî 0,4 xeniqîn û jiyana xwe ji dest da. Ev rêje di sala 2016’an de derket 1,4’an û di sala 2017’an de bû 1,8.

Rêjeya mirinê ya sala 2018’an

Rêjeya mirina penaberan a di ser Deryaya Spî re derbasî welatên YE’yê bûn, zêde bû. 55 hezar penaber gihaştin YE’yê, herî kêm hezar û 477 kes jê xeniqîn û jiyana xwe ji dest da. Ev jî tê wê wateyê ku kesên jiyana xwe ji dest daye li gorî kesên xilas bûyî, rêjeya wan ji sedî 2,7 e.

Li Deryaya Spî sedema zêdebûna mirinan, anîna tedbîrên dijwar ên piştî peymana binîqaş a penaberan a di navbera YE û Tirkiyeyê de ku di sala 2016’an de hate çêkirin, bi bandor bû. Li aliyê din lihevkirina di navbera Lîbya, Îtalya û YE’yê de jî bû sedem ku rêjeya mirinan qat bi qat zêde bibe.