Li Efrînê 2 bira hatin qetilkirin

EFRÎN

Çavkaniyekî ji kantona Efrînê ji nûçegihanê ajansa me re ragihand ku artêşa tirk a dagirker û çeteyên wê yên bi navê Ehrar El-Şam du birayên bi navên Casim Ebd Efarim (23) û Xelef Ebd Efarim (25) revandin.

Heman çavkanî got ku çeteyan her du bira birin girtîgeha parêzgeha Idlibê û li wir bi awayekî hovane îşkence li wan kir, ji bo serbestberdana wan jî mîqdarek mezin a pereyan ji malbata wan xwest. Lê duh çeteyan li gundê Xirbet El-Coz a li nêzî deriyê sînor ê Bab El-Hewa ya Idlibê her du bira qetil kirin. Heman çavkanî da diyarkirin ku malbatê cenazeyên her du birayan bi dest xistin û ew li goristana taxa Zêdiyê ya Efrînê defin kirin.

Artêşa tirk a dagirker û çeteyên wê binpêkirinên xwe yên li dijî gelê Efrînê bê navber didomînin. Rojane bûyerên dizî, talan û kuştinê didomînin.

Hate zanîn ku di meha derbasbûyî de artêşa tirk a dagirker û çeteyên wê bi dehan welatiyên kantona Efrînê kuştin. Ji wan nasnameya kalepîrê 70 salî Hemdî Ebdo yê ji gundê Berad û hevjîna wî Sultana Xelîl Nasro (70) piştî îşkence kirin, bi recmê qetil kirin. Her wiha ciwanê 21 salî Dilovan Ismet ê ji gundê Cilbirê dema dixwest derbasî xaka Tirkiyeyê bibe, li herêma Silqîn a Parêzgeha Idlibê hate kuştin. Ne tenê wiha kesê bi navê Hisên Şêxo (52) ku di mêjiyê de xwe astengdar e, di bin îşkenceyê de ji aliyê çeteyan ve hate kuştin.

ANHA