Koçberên Iraqê ji zilma dewleta tirk hatin Minbicê

 SELWA EBDUREHMAN – KAMÎRAN XOCE / MINBIC

Derdora 100 penaberên ji Iraqê yên hatibûn Sûriyeyê û li herêma Idlibê bi cih bûbûn, ji ber zilm û zordariya dagirkeriya dewleta tirk û çeteyên wê di deriyê sînor ê Ewn Dadat re derbasî herêma Minbicê bûn. Koçber dê ji Minbicê derbasî kampa Holê ya katona Hesekê bibin û ji wir jî derbasî Iraqê werin kirin.

Koçberên Iraqê yên ku beriya sal û nîvekê derbasî kampa Idlibê bûbûn û ji ber ku nikaribûn kar li wê derê bikirana, berê xwe da deriyê sînor ê Ewn Dadat ê di navbera Meclisa Leşkerî ya Minbicê û çeteyên Diri El Fûrat de. Koçber ji Minbicê dê derbasî kampên Holê yên herêma Cizîrê û ji wê derê jî derbasî Iraqê bibin.  

Di vê derbarê de nûçegihanê ajansa me berê xwe da deriyê sînor û bi gelek koçberan re hevdîtin pêk anî.

Koçbera bi navê Esraî Haşim ya ji bajarê El-Enbar yê Iraqê û dayika 6 zarokan, da zanîn ku ew berê li kampên Idlibê bûn û ji ber zilma çeteyên DAIŞ`ê ew reviyan û berê xwe dan vê derê.  

Esraî Haşim da zanîn ku piştî malên wan xerab bûn wan berê xwe da bajarokê Serqîn ê parêzgeha Idilbê ya Sûriyeyê û ew hatin vê derê, ji ber ku ew li ewlehiyê digerin, lê rastî zilm û zordariya dewleta tirk a dagirker û çeteyên wê hatin. 

Koçberê bi navê Ekrem Hesen jî da zanîn ku ji ber zilm û zordariya DAIŞ`ê û şerê ku li bajarê wan rûdide wan dev ji warê xwe berda. Hesen diyar kir ku wan gelek îşkence ji dewleta tirk û çeteyên wê xwarin, ji ber ku wê derbasî axa Tirkiyeyê bibûna û li wir kar bikirana, lê hatin  vegerandin kampan.

Tê zanîn ku derdora 215 koçberan beriya 15 rojan deriyê sînor ê Ewn Dadat derbas kir û berê xwe da kampa Holê bi alîkariya Hêzên Ewlekariya Hundirîn û Rêveberiya Sivîl a Minbicê, ji bo ku ji wê deverê berê xwe bidin Iraqê bi hevkariya di navbera wan û hikumata Iraqê de jî di demeke nêz de werin şandin.   

ANHA