Zarok di mîhrîcanê de geşbînî û kêfxweşiyê dibînin

Di Mîhrîcana Bazirganiyê ya Qamişloyê de hebûna çalakî û lîstokên ji bo zarokan, dihêle zarok demeke xweş derbas bikin.

ROJANE

23 tîrmeh, 2026 07:46

QAMIŞLO

MIHEMED NÛRÎ ALO

Li Qamişloyê mîhrîcan û pêşangehên bazirganiyê li gelek deveran di havînê de pêk tên. Rewşa ewlehî ya biîstiqrar hiştiye ku çalakiyên bi vî şêwazî bên birêxistinkirin. Gelek malbat tevî zarokên xwe beşdarî van çalakiyan dibin. Mîhrîcanên ku tên orgenîzkirin ji bo şêniyan dibin cihê kêfxweşî.

Ji 20`ê Tîrmehê ve bi armanca aktîfkirina tevgera bazirganiyê, li Stadyuma Şehîdên 12`ê Adarê Mîhrîcanan Bazirganiyê ya Qamişloyê bi beşdariya 45 şîrket û kargehên ji herêmên cuda yên Sûriyeyê û derveyî Sûriyeyê dest pê kiriye û dê 5 rojan dewam dike.

Tevî ku mîhrîcan a bazirganiyê ye jî ji bo zarokan gelek derfetên çalakiyan û lîstokan hatine peydakirin.

Di dema şopandina me ya ji bo mîhrîcanê de, hejmarek zarokên ku bi malbatên xwe re beşdar bûne, kêfxweşiya xwe anî ziman. Zarokan diyar kir ku ev çalakî derfeteke baş daye wan û daxwaz kir ku birêxistinkirina çalakiyên wiha bidomin.

Şêniyan jî destnîşan kir ku hem pêwîstiyên xwe dikirin hem jî kêfxweşî ji bo malbat û zarokan peyda kiriye.

(sb)

ANHA