Xwendina parêznameyan civakeke birêxistinkirî û xurttir ava dike

Xelkê bajarê Til Birakê xwendina parêznameyên Rêber Abdullah Ocalan weke jêdera sereke ya îlhama fikira şoreşgerî dibînin û pratîze dikin.

28 sibat, 2025 02:35

HESEKÊ

AMIR EZAWÎ

Di nav kolanên bajarê Til Birakê yê kantona Cizîrê û bajarokên wê de ku dîrok bi guhartinên hemdemî re rûbirû dimîne, bi dehan jin û mêr bi awayekî heftane dicivin û li ser parêznameyên Rêber Abdullah Ocalan nîqaş dikin. Mijar ne tenê xwendin e, lê belê jinûve xwenaskirin û jinûve civaknaskirin e û pratîzekirina wan e.

ÇIMA PARÊZNAME TÊN XWENDIN?

Hevserokê Partiya Yekitiya Demokratîk (PYD) a Til Birakê Îvan Silêman diyar kir ku xwendin bi xwe ne armanc e, lê belê navgîna damezirandina civakeke zana ye ku erk û mafên xwe nas bike û got: “Civînên heftane yên li bajêr û gundewarê wî bi armanca analîzkirin û nirxandina fikrên Rêber Abdullah Ocalan ên ku bûne nexşerêya azadî û wekheviyê ji bo gelan, tên lidarxistin.”

Silêman diyar kir ku di civînan de ne tenê nîqaş tên kirin, her wiha encamên wan li ser erdê jî hatin dîtin wekî pêşxistina zanabûna civakî, xurtkirina rola jinan, têkoşîna li dijî aloziyên navxweyî û gendeliyê.

Silêman destnîşan kir ku tenê fikr bê ku pratîka wê li ser erdê hebe, têrê nake û got: “Gelê ku erk û mafên xwe nas bike dikare destkeftiyên xwe jî biparêze. Em vê yekê jî îro di hevgirtina gel a bi hêzên leşkerî re yên ku herêmê ji gefên derve diparêzin de, dibînin.”

FIKR Û RASTÎ DIBIN YEK: TECRÛBEYA TIL BIRAK

Beşdarên civîn û xelekên xwendinê hewl didin piştî nîqaşan, fikrên ku nîqaş dikin pratîze bikin. Endama Meclisa Til Birakê Henîn Silêman got: “Parêzname ne tenê nivîsên teorîk in, lê belê ew nexşerêya naskirina rastiyê û rastavakirina wê ne."

Henîn Silêman wiha domand: “Dema ku em parêznameyan dixwînin, em dizanin ku Rêber Abdullah Ocalan ne tenê nêrîneke siyasî pêşkêş kir, her wiha wî rêbazek ji bo naskirina mirov, civak û dîrokê danî. Ew li ser girîngiya azadiyê axivî, lê di heman demê de girîngî da berpirsiyariyê. Êdî her kesek di civakê de di avakirina pêşerojeke bi edalet de xwedî rol e."

Henîn Silêman diyar kir ku berê li gorî berjewendiyên siyasî, gelê herêmê ji îradeya wî dihat dûrxistin, lê îro bi saya fikrên Rêber Abdullah Ocalan êdî gel bi xwe pêşeroja xwe diafirîne û çarenûsa xwe diyar dike.

VEGUHASTINA ÎMRALIYÊ JI BO AKADEMIYEKE FIKRÎ

Endama PYD’ê Ehid Ebdurezaq diyar kir ku tevî hewldanên tecrîdê yên li ser Rêber Abdullah Ocalan û sînordarkirina fikrên wî di Îmraliyê de, lê dîsa jî ev fikr zindî man û ji tevgerên rizgariyê yên Bakur û Rojhilatê Sûriyeyê re bûn nexşerê.

Ehid Ebdurezaq diyar kir ku Rêber Abdullah Ocalan girtîgeha xwe ya Îmraliyê veguhast akademiyeke fikrî û ji gelan jî bûn çeka herî xurt."

Ehid Ebdurezaq destnîşan kir ku gelên ku xwe bi fikrê bi çek bikin, tu carî nayên têkbirin û got: “Gelek hêzên leşkerî ji ber tunebûna nêrînan têk çûn. Gelek şoreş jî ji ber tunebûna fikrekî stratejîk vemirîn. Lê belê îro em dibînin ku projeya Rêber Abdullah Ocalan her diçe zêdetir tê rûniştandin, ji ber ku bingeha wî ne tenê berxwedana çekdarî bû, her wiha avakirina civakeke hevgirtî, berxwedêr û pêşketî bû.”

PARÊZNAME.. DERIYÊ PÊŞEROJEKE CUDA YE

Ev xelek û civîn li seranserî herêmên Bakur û Rojhilatê Sûriyeyê tên lidarxistin da ku şênî bizanin ku şerê rastîn ne tenê bi çekê, her wiha bi zanabûn û rêxistinbûnê ye. Li Til Birakê nîqaşên li ser fikrên Rêber Abdullah Ocalan di jiyana rojane de jî cih digirin û beşdar hewl didin wan pratîze bikin û bikin proje.

Bi rêya van xelek û civînan şêniyên Til Birakç dibînin ku fikrên Rêber Abdullah Ocalan neynika rewş û armancên wan in û ji bo derbaskirina zehmetiyên derve û hundir ji wan re dibin destek.

(mh/fr)

ANHA