Xelatgirên Pêşbirka Helbesta Kurdî ya Ciwanan diyar bûn

Hevgirtina Rewşenbîrên Rojavayê Kurdistanê (HRRK) ji bo ragihandina helbestvanên serkeftî yên Pêşbirka Helbesta Kurdî ya Ciwanan a 2025`an, li navenda xwe ya li Qamişloyê civîneke çapemeniyê li dar xist.

Endamên HRRK`ê Kemal Necim û Enahîta Şêxo daxuyaniya têkildarî mijarê bi kurdî û erebî xwend.

Di daxuyaniyê de hate diyarkirin ku di yekê Çileya 2025`an de bi alîkariya Komeleya Janê Xelef a Xêrxwaziyê li Îngilistanê, wan wek HRRK cara 5`emîn Pêşbirka Helbesta Kurdî ya Ciwanan a Sala 2025’an ragihand û hate gotin: “Diviyabû ku di 10`ê Adarê de deriyê beşdariya pêşbirkê hatibûya girtin, lê ji ber rewşa awarte ya li Sûriyeyê û li Rojava piştî hilweşîna rejîmê, her wiha êşa koçberiya duyemîn ya gelê me yê Efrîn û Şehbayê, komîteya amadekar biryar da ku dema rêkirina berheman heta 20`ê Adarê were dirêjkirin.”

Xelatgirên Pêşbirka Helbesta Kurdî ya Ciwanan wiha ne:

Helbesta yekemîn: Helbesta bi navê “Bihêle di vê şevê de hebhinarkê” ya helbestvan Fatma Eto.

Helbesta duyemîn: Helbesta bi navê “Roja tu çû” ya helbestvan Dilyar Hebîb.

Helbesta sêyemîn: Helbesta bi navê “Pelên Zemînê” ya helbestvan Sebrî Elî.

Helbesta çaremîn: Helbesta bi navê “Rê” ya helbestvan Aras Mihemed Xêr.

Helbesta pêncemîn: Helbesta bi navê “Sêrebenda Dêrîn” a helbestvan Ayfer Yildizistan.

Pêşbirka Helbesta Kurdî ya Ciwanan cara yekem di sala 2021`an de ji hêla HRRK’ê û bi sponseriyê Komeleya Janê Xelef a Xêrxwziyê li Îngilistanê hate lidarxistin. Di pêvajoya 5 salan de bi sedan ciwan beşdarî pêşbirkê bûn û helbestên xwe pêşkêş kirin. Di encama pêşbirkan de her sal 3 helbestên têne xelatkirin, lê îsal ji ber sala 5`emîn 5 helbestvanan xelat girtin. 

(sb)

ANHA