Xebatkarên tenduristiyê yên li bendava Tişrînê jiyana birîndaran parast

Ekîbeke bijîşkan û xebatkarên tenduristiyê, li gel 3 ambulansan, li nuqteya tenduristiyê ya li bendava Tişrînê bi cih bûne û xizmetên tenduristiyê didin çalakvanên li bendavê.

Bendava Tişrînê û herêmên derdora wê ev 55 roj e rastî êrişên tund û berdewam ên artêşa Tirk a dagirker û çeteyên wê tên, her wiha her roj bi balafirên bêmirov, balafirên şer û topan jî tê bombebarankirin.

Di encama êrişên rasterast ên artêşa Tirk a dagirker ên li ser nobedarên li bendavê de, bi dehan sivîl şehîd bûn.

Li gorî Desteya Tenduristiyê ya Bakur û Rojhilatê Sûriyeyê, di encama êrişên dewleta Tirk a dagirker û çeteyên wê de 41 sivîl şehîd bûn û nêzî 245 sivîl jî birîndar bûn.

Endamê ekîba tenduristiyê Dr. Zekeriya Osman diyar kir ku ew pir zehmetiyan dikişînin, ji ber ku artêşa dagirker û çeyên wê bi awayekî rasterast êrişî ekîbên tenduristiyê dikin, her wiha derman û pêdiviyên din ên tenduristiyê jî kêm in.

Li gorî Osman di nuqteya tenduristiyê de 3 bijîşk û 7 alîkar û 3 ambulans hene.

Human Rights Watch (HRW) diyar kiribû ku dewleta Tirk a dagirker û çeteyên wê di 18’ê Çileya 2025’an de li bakurê Sûriyeyê êrişek bi balafireke bêmirov li dijî ambulanseke Heyva Sor a Kurd pêk aniye û diyar kir ku ev yek “sûceke şer” e.

Zekeriya Osman diyar kir ku rapora HRW’ê ya der barê êrişên dewleta Tirk a dagirker de ku xebatkarên tenduristiyê dike hedef, têrê nake û got: "Şerm e ku rêxistinên navneteweyî li hember tiştên ku diqewimin bêdengiya xwe berdewam bikin.”

Zekeriya Osman bang li rêxistinên navneteweyî û tenduristiyê kir ku zextê li dewleta Tirk bikin ku binpêkirinên xwe yên li dijî sivîlên li Bakur û Rojhilatê Sûriyeyê rawestîne.

(k)