UNICEFˊê av li ser kampên koçberên li Şehbayê qut kir

Dema ku Efrîn hate dagirkirin û gelê Efrînê derbasî Şehbayê bû UNICEFˊê av li seranserî herêma Şehba û kampan belav kir. Av bi rêya erebeyan li depoyên blastîkî yên li gund û kampan hatine danîn dihat belavkirin. Lê di sala 2020’ an de belavkirina avê li ser gundên navçeyên Til Rifet, Şêrewa, Eherz û Ehdasê pir kêm kir. Lê di sala 2021’an de jî li seranserî herêmê qut kir. Her wiha rêjeya avê li kampan jî hat kêmkirin û daxistin 650 hezar lître av. 

Her wiha li kampa Serdem 300 hezar lître, kampa Berxwedan jî 280 hezar lître, li kampên Efrîn, Şehba û Vegerê jî 45 hezar lître av dihat belavkirin. Ev rêje di demsala zivistanê de bû. Di demsala havînê de rêjeya avê zêde dibû û 950 hezar lître av dihat belavkirin.

Di 15’ê Sibatê de êdî av bi temamî li ser kampan hate qutkirin.

Der barê mijarê de koçber û endama şaredariya kampa Berxwedanê ji ajansa me re axivîn.

Endama şaredariya Kampa Berxwedan Lîlav Şêxo destnîşan kir ku nêzî hefteyekê UNICEFˊê av li ser kampan qut kiriye û wiha got: “Em rastî gelek zehmetiyan tên. Ji ber ku bingeha jiyanê li ser avê ye. Bi qutkirina avê re dê gelek krîz û karesat rû bidin. Yek ji van krîzan jî wê nexweşî zêde bibin. Her wiha pêşiya me havîn e û pêwîstiyeke zêdetir bi avê heye. Weke şaredarî em dikarin niha avê ji bo gel peyda bikin. Lê di werza Havînê em ê zehmetiyan zêdetir bikişînin.”

Koçbera bi navê Sebah Topel diyar kir ku UNICEFˊê li ser kampan av qut kiriye û wiha anî ziman: “Em Rêxistina UNICEF şermezar dikin. Her wiha ev yek  jî ji bo me zehmet be. Lê belê diviyabû ku xebata xwe berdewam bikira û av qut nekira.”

Her wiha welatiyê bi navê Ebdîn Hemo jî wiha got: “Qutkirina avê wê bi xwe re pirsgirêkên mezin bîne, ji ber vê jî pêwîstiya gel bi avê heye. Em Rêxistina UNİCEF şermezar dikin.”