Şêniyên Til Temir li bendê ne pirsgirêka avê çareser bibe

Şêniyên bajarê Til Temirê anî ziman ku pirsgirêka avê ev bûye zêdetirî 7 salan didome. Bi sedan malbatan zehmetê dikişên û bi taybet di havînê de pirsgirêk hîn mezintir bûye. Ava bîrên Elokê hîna li ser torên avê yên giştî qut e û av biha bûye. Şênî ji ber pirsgirêka aborî û bihabûna madeyên sotemeniyê û madeyên sereke yên jiyanê gelekî zehmetî dibînin.

Ciwanê bi navê Hisên El Şêx Elî got: "Ji bo em pêdiviya xwe ya avê pêk bînin em neçarin avê ji tankên avê bikirin. Ew jî avê biha difiroşin û gelek malbat xizan in, nikarin avê ew qasî biha bikirin. Ji bo em 5 bermîlên avê tijî bikin 50-60 hezar lîreyê Sûriyeyê ji me dixwazin."

Her wiha Nîf El Salih diyar kir ku pirsgirêkê barê şêniyan giran kiriye û wiha lê zêde kir: "Em ji aliyên têkildar dixwazin ku avê ji stastyona Elokê berdin û ev pirsgirêk çareser bibe. Gelek caran hatiye gotin ku dê pirsgirêka stasyona Elokê çareser bibe lê heyanî niha tug av ne avêtine û ev bûye zêdetirî 7 sal pirsgirêka avê heye."

Cîgirê hevserokên Meclisa Bajarê Til Temirê Hesen Oso anî ziman ku ew bi gerînendetiyên têkildar re dicivin û wiha got: "Di destpêkê de em bi rêveberiya sotemenî û veguhastinê re civiyan û ji bo pirsgirêk sivik bibe hinek tedbîr girtin."

Ji bo sedema sereke ya pirsgirêka ava Til Temirê Oso wiha axivî: "Ji ber ava stasyona Elokê li ser me qut kirin, pirsgirêka avê derket. Meclis her tim ji aliyên têkildar dixwaze ku ava Elokê berdin û pirsgirêka avê çareser bibe. Ji bo barê şêniyan sivik bibe û avê biha nekirin, dê komîteya sotemeniyê mazotê li xwediyên tankên avê belav bike."

Pirsgirêka avê Til Temirê didome û şênî ev bi salan e li bendê ne ku ava stasyona Elokê berdin û pirsgirêk çareser bibe.

(np)

ANHA