Şêniyên taxa Cûdî daxwaza veguhestina cihê çopê kir

Şêniyên taxa Cûdî (Qenat El Siwês) a bajarê Qamşloyê ji bo pirsgirêka çopê çareseriyê dixwazin. Şaredarî çopa ji bajar kom dike tavêjê derdora taxê. Dema ku şaredarî vê çopê dişewitînê bêhn û dûman li ser serê taxê dikevin. Di encama vê bêhn û dûmanê de şênî aliyê tenduristiyê de ziyan dibînin û jîngeh gemar dibe.

Xelkê Qamişloyê ev demeke gazinc dikin ku çop gelekî li kolanên Qamişlo kom dibe û şaredarî raneke. Ev pirsgirêk çareser nebûye û hîna li kolanên Qamişlo çop heye. Kombûyîna çopê bandorê li ser hewa, jîngeh û tenduristiya şêniyan dike.

Şêniyên taxa Cûdî destnîşan kirin ku ew gelek caran çûne gel Şaredariya bajarê Qamişlo û pirsigrêka xwe bi wan re parve kirine.

Di vê çarçoveyê de Hevserokê Komîna Şehîd Osman a taxa Cûdî Îmad Şêxmûs Mehmûd got: "Şaredarî çopê diavêjê cihekî nêzî taxa me. Ev yek raste rast ziyanê dide şêniyan. Dûman û bêhn bandorê li ser tenduristiyê me dike. Bi taybet nexweşên ku astim (rebû) bi wan re ye gelekî zehmedî dîbinin nikarin nefes bigirin. 

Mehmûd got wan gelek caran gazinc kirine û rapor ji şaredariyê re şande û wiha axivî: "Gelek caran em çûn Şaredariya Gel û me gazincê xwe kir. Ji ber ku ziyanên em dibînin me raporek radestî şaredariyê kir. Lê pirsgirêk nehat çareserkirin. E dixwazin şaredariyê cihê çopê biguhere û bibe derveyî bajêr. Berê çop diavêtin herêma Navkurê ev bûye 7 sal diavêjin nêzî taxa me. Em dixwazin pirsgirêka cihê çopê were çareserkirin. "

Şêniyê bi navê Ebûd Hisên El Xidir ê ji heman taxê jî got: "Em li taxê dijîn û ji ber bêhn û dûmanê çopê em gelekî zehmetiyan dibînin. Dema çopê dişewitînin dûmanê wê bi ser serê me dikeve û bandorê li ser kesên bi teman û nexweşxan dike."

El Xidir bang li aliyên têkildar kir ku cihê çopê bibin ji derveyî bajêr.

ŞAREDARÎ DAXUYANÎ NEDA

Têkildarî vê pirsgirkên û gazinciyên şêniyan me xwe gihand rêveberên Şaredariya Qamişloyê. Lê şaredariyê tu daxuyanî da, tenê bersiva "Zexta kar li gel me heye" da.

(np)

ANHA