Şêniyên Qamişloyê sersaxî ji malbata şehîd Ebdulqadir Îbrahîm re xwest

Bi sedan şêniyên Qamişloyê sersaxî ji malbata şervanê Hêzên Komandos şehîd Ebdulqadir Îbrahîm yê ku di 9`ê Kanûnê de li Dêrazorê şehîd bûbû xwestin. Konê sersaxiyê li ber mala şehîd a li taxa Hilêliyê hatibû vedan.

Şêniyên Qamişloyê, dost û hevalên şehîd, endamên Kongra Star, Partiya Yekitiya Demokratîk (PYD), Tevgera Civaka Demokratîk (TEV-DEM) serdana konê sersaxiyê yê şehîd kirin. Beşdarvanê merasîmê bi sloganên `Şehîd Namirin` û strana `Şervano` sersaxî ji malbata şehîd Ebdulqadir Îbrahîm re xwestin.

Di merasîmê de endamê Meclisa Malbatên Şehîdan a bajarê Qamişlo Elî Sadûn axivî û diyar kir ku axaftin têra şehadetê nake û ew bi axaftinê ti carî nikarin mafê şehîdên xwe bidin û wiha pê de çû: “Hebûna me bi saya şehîdên me ye, tenê bi pêkanîna soza berdewamkirina rêya şehîdan em dikarin mafê şehîdên xwe bidin wan.”

Endama Kongra Star Şaha Hesarî jî behsa şehîdan kir û got: “Heke axa welatê me tevahî rûpel bana û darên Kurdistanê hemû pênûs bana, me nikarîbû bi wan wesfa şehîdê xwe bikira. Ji ber cihê wan ê herî jor e, ancex bi şopandina rêya wan em xwe bighînin wan.”

Di axaftina xwe de Şaha Hesarî bal kişand ser berxwedana Rêber Abdullah Ocalan li dijî tecrîda girankirî û her wiha têkoşîna girtiyên di zindanên Bakurê Kurdistanê û Tirkiyeyê de û got: “Rêberê me, em hemû bi te re ne, em gireva birçîbûnê ya girtiyên zindanan silav dikin. Em hene û ji dû sozê xwe venagerin, wek dayikên Kurd em ê her car di bin konê şehîdên xwe de sozên xwe nû bikin.”

Endamê Partiya Yekitiya Demokratîk (PYD) Mihemed Xêr Elîka jî axivî û destnîşan kir ku çeteyên girêdayî hikumeta Şamê û dewleta Tirk a dagirker xwestin li Dêrazorê bi derxistina tevlîheviyê di navbera gelan de Rêveberiya Xweser têk bibin û wiha pê de çû: “Bi felsefeya Rêber Apo gel derxistina tevlîheviyê nas kir û rê li ber girt, gelê li Sûriyeyê her xwestiye bi hevkarî û biratî bijî, gelê me xwedî hêz û soza bi şehîdên xwe re ye.”

Merasîmê sersaxiyê bi slogana `Şehîd Namirin` bi dawî bû.

(sb)

ANHA