Şêniyên Firatê bi merasîmeke biheybet şehîd Şêro Kobanê oxir kir

Şehîd Şêro Kobanê bi merasîmekê li Pakrewangeha Şehîd Dîcle ya li Kobanê hat veşartin.

ROJANE

14 adar, 2024 13:23

KOBANÊ

Şervanê Hêzên Sûriyeya Demokratîk (QSD) şehîd Şêro Kobanê (Îbrahîm Hesen Bozo) 12’ê Adarê di operasyona rakirina mayinan de şehîd bûbû. Şehîd bi merasîmekê ji aliyê bi sedan şêniyên kantona Firatê ve li Pakrewangeha Şehîd Dîcle ya li Kobanê hat veşartin.

Di merasîmê de rêvebera Meclisa Malbatên Şehîdan a Navçeya Qinê Şêrîn Mihemd Hisî soza şopandina rêya şehîdan da û got: " Li ser her bihosteke vî erdî xwîna şehîdek herikiye. Em ê heta dawiyê xwedî li şehîdên xwe derkevin û rêya wan bişopînin."

Endamê Meclisa Leşkerî ya Kobanê Zana Qehro li ser kesayeta şehîd Şêro got: "Şehîd Şêro ji bo parastina axa xwe bê teredûd di pêvajoyên herî zor û zehmet de berxwedanî kir. Şehîd Şêro li hemberî dijminê paşverû tenê rêya berxwedanê şopand. Em ê jî heta dawiyê xwedî li mîrateya Şêro derkevin. Em soz didin dê xwîna şehîdan li erdê nehêlin, em ê tola wan ji dijmin hilînin.”

Piştre wesîqeya şehîd Şêro Kobanê hat xwedin û radestî malbata wî hat kirin.

Girse piştî ku şehîd spart axê, berê xwe da konê sersaxiyê ku li gundê Qasimiyê yê Kobanê hatiye vedan.

(sş/bb)

ANHA