Şêniyên Dêrikê di salvegera serkeftina Kobanê de meşek li dar xist

Bi sedan şêniyên bajarê Dêrikê bi boneya salvegera 11’an a serkeftina Kobanê li hemberî çeteyên DAIŞ’ê meşek li dar xist.

Girseya li Qada Azadî kom bû, bi berzkirina dirûşmên silavkirina berxwedana Rojava û Kobanê ber bi sûka navendî ve meşiya. Li sûka navendî deqeyekê rêz hat girtin. Piştre endama Meclisa Giştî ya PYD’ê Hediye Yûsif axivî û berxwedana şervanan a li hemberî êrişan silav kir.

Hediye Yûsif destnîşan kir ku gelê Kurd çawa di berxwedana Kobanê ya 2014’an de bi ser ket, dê careke din bi ser keve û dê ev serekftin di rûpelên dîrokî de were nivîsandin.

Hediye Yûsif bi domdarî diyar kir: "Şer li ser me tê ferzkirin da ku herêmê bikişînin nava şerekî mezhebî yê Kurd û Ereban û ewlehiya herêmê têk bibin. Lê ev hewldan dê bi ser nekevin."

Hediye Yûsif anî ziman ku kesên di 2014’an de êrişî Kobanê kirin niha jî êrişî dikin û wiha domand: "Bi rihê berxwedana Kobanê, bi yekitiya gelê Kurdistanê em ê bi ser kevin û li hemberî palanên li dijî nasnameya me tên kirin bi ser kevin."

Hediye Yûsif di dewama axaftina xwe de got: "Gelê me yê Rojava berxwedana rûmet, mirovahî û azadiyê dike. Gelê Kurd gelekî bi hez û têkoşer e. Di piştevaniya Kobanê de cîhanê me nas kir ku em serî ji zulm û qirkirinê re natewînin. Em timî amade ne xwe ji planan biparêzin."

Hediye Yûsif di dawiya axaftina xwe de ev tişt anî ziman: "Gelê Kurd bûye yek. Bi yekitiyê em ê şer bikin û terorê têk bibin."

Meş bi berzkirina dirûşmên silavkirina berxwedana Rojava bi dawî bû.

(b)

ANHA