Şêniyên Cizîrê û Kobanê parastina herêmê didomînin

Şêniyên kantona Cizîrê û bajarê Kobanê di çarçoveya seferberiya giştî de parastina herêmên xwe didomînin. Li Kobanê ya dorpêçkirî madeyên bingehîn, derman û şîrên zarokan kêm in.

ROJANE

28 ÇILE, 2026 10:03

NAVENDA NÛÇEYAN

Şêniyên kantona Cizîrê û bajarê Kobanê bi rêya komîteyên gel ên ku ava kirine, parastina tax, gund û bajarokên xwe didomînin. Aliyên têkildar jî koçberên ji Reqa, Tebqa, Dêrazor û Şehbayê hatine, bi cih dikin û pêdiviyên wan dabîn dikin, her wiha alîkariyên mirovî yên ku ji parçeyên din ên Kurdistanê têne şandin, li wan belav dikin.

Çeteyên hikumeta demkî yên destekê ji dewleta Tirk a dagirker digirin dorpêçkirina bajarê Kobanê didomînin. Ev yek bû sedema kêmbûna kel û pelan, pêdiviyên bingehîn ên wekî dermanan û şîrên zaroken.

Tevî bangewaziyên domdar ên ji bo rakirina dorpêçê jî çeteyên hikumetê dorpêç û êrişên xwe li ser gundewarên başûr û rojavayê bajar didomînin.

Li aliyekî din ji parçeyên din ên Kurdistanê gelek ciwan ku banga seferberiya giştî bi cih anîne û hatine Rojava, cihê xwe li eniyên pêş ên şer girtiye. Ciwanên Kurdistanê bi biryar in Rojava biparêzin.

Li bazarên bajar jî tevgera şêniyan a ji bo pêdiviyên xwe yên rojane dewam dike.

(b)