Şehîdên Bendava Tişrînê hatin bibîranîn

Tevgera Çand û Hunera Demokratîk a Mezopotamyayê li bajarê Qamişlo ji bo 6 şehîdên berxwedana Bendava Tişrînê; şanoger Cûma Xelîl (Bavê Teyar), endamên Meclisa Malbatên Şehîdan Kêfo Osman û Ekrem Rexo, hevseroka Ofisa Partiya Yekitiya Demokratik a Qamişloyê Menîce Heyder û endamên Meclisa Qamişloyê Muzefer Mihemed û Ebdulqadir Îbrahîm ku di 18'ê Çileya 2025'an de dema ku nobedariya Bendava Tişrinê dikir di êrişa artêşa dewleta Tirk a dagirker de şehîd bûbûn, li Pakrewangeha Şehîd Delîl Saroxan a Qamişloyê bi merasîmekê bi bîr anîn.

Di merasîma bîranînê de malbatên şehîdan, şanoger, sazî û komên hunerî û Meclisa Malbatên Şehîdan amade bûn.

Merasîmê bi deqeyeke rêzgirtinê ji bo giyanê şehîdan dest pê kir, piştre endamê Meclisa Malbatên Şehîdan Mihyedîn Hesen axivî û hemû şehîdên ku li Bendava Tişrînê canê xwe feda kir, bi bîr anîn û anî ziman ku çi qas di şexsê van her şeş şehîdan de biaxivin, gotin û wesifdanîn dê kêm bimîne.

Şanoger Hejar Remo jî axivî û diyar kir ku şehadeta hevreyê wî Cûma Xelîl qet ji bîra wan neçûye, her wiha Cûma Xelîl her tim ew fêrî berxwedan û têkoşînê kir û hezkiriyê azadiyê û yekitiya gelê Kurd bû.

Hejar Remo da xuyakirin ku Cûma Xelîl di nava hemû berxwedanan de cihê xwe digirt û digot “qelenê welat ne erzan e”.

Hevserokê Tevgera Çand û Hunera Demokratîk a Mezopotamyayê Xelîl Tehlo jî sersaxî ji malbatên şehîdan re xwest û anî ziman ku gelê Kurd bi berxwedan û parastina xaka welatê xwe dîrokek nivîsand, şehîd Cûma Xelîl û hevalên wî ji bo azadî û aştiyê têkoşîn kirin heya gihaştin asta şehadetê û ew ê xwedî li keda şehîdan derkevin.

 (re)

ANHA