Şehîd Stêra Sîser li Helebê hat bibîranîn

Meclisa Malbatên Şehîdan ji bo gerîlaya Yekîneyên Parastinê yên Rojhilatê Kurdistanê (YRK) Stêra Sîser (Sêvda Koşan) a ku di 2024’an de li herêma Asûsê şehîd bûye, merasîmek xiyabî li dar xist.

Merasîm li qada Şehîdan a rojavayê taxa Şêxmeqsûd a bajarê Helebê hat lidarxistin. Di merasîmê de endam û nûnerên partiyên siyasî, saziyên sivîl, meclis û komîn amade bûn.

Di merasîmê de rêvebera Saziya Gaziyan Roşîn Hesen têkoşîna şehîd Stêra Sîser li Rojhilatê Kurdistanê û berxwedana wê li hember pergala melalî ya ku hebûn û nasnameya jinan înkar dike, bi bîr xist.

Roşîn diyar kir ku jinên Kurdistanê yên li çar parçeyan bi ruh û vîna jina azad têkoşîna xwe li hember mêtingerên ku rastiya Kurdistanê û azadiya gelê wê red dikin, dewam dike.

Roşîn Hesen domandina têkoşîna jinan a li 4 parçeyên Kurdistanê teqez kir.

Rêveberê Hêzên Ewlekariya Hundirîn Hesen Henan jî axivî û soza parastina nirx û destkeftiyên şehîdan û şopandina rêya wan dubare kir.

Birayê şehîd Stêra Sîser, Çiya Koşan got malbat bi şehadeta keça xwe serbilind e û soza şopandina rêya şehîdan dubare kir.

Di dawiya merasîmê de endama Meclisa Malbatên Şehîdan Zelûx Şêx Qenber wesîqeya şehadetê xwend û radestî malbatê kir.

(mh/fr)

ANHA