Şaredariya Qamişloyê plana xwe ji sedî 85 temam kiriye

Şaredariya Gel a Qamişloyê projeyên berfireh li piraniya taxên bajêr pêk tîne. Şaredariyê ragihand ku ji sedî 80’yê plana xwe ya salane temam kiriye û karê mayî li gorî bernameyê didome.

CIVAK Û JIYAN

18 cotmeh, 2025 05:05

QAMIŞLO

SLAVA ABDULREHMAN

Hevşaredara Qamişloyê Berîvan Umer diyar kir ku projeyên rê, av, paqijî û kanalîzasyonê hatine pêkanîn. Her wiha da zanîn ku pêkanîna projeyan li gorî plana giştî ya salê hatiye pêk hatiye û piraniya xebatê di nav demên diyarkirî de qediyaye. Lê hin proje hîn jî tê payîn ku di 3 mehên dawîn ên salê de biqedin.

Şaredariyê projeya kolandina bîrên avê temam kiriye. Her wiha ji sedî 75’ê projeya tora elektrîka bîran jî pêk aniye, tîmên şaredariyê ji bo temamkirina wê xebata xwe didomînin.

465 cihên derbaskirina ava li kolanên sereke yên gelek taxan hatine çêkirin, ev xebat ji sedî 98 temam bûye û hiştiye ku derbasbûna ava baranê hêsantir bibe û av li kolanan kom nebe. Ji sedî 90’ê xebata raxistina rêyan bi kevirên şikandî li taxa Cirnikê jî temam bû.

Şaredarî her wiha projeya xwe ya asfaltkirina rêyên taxa Tey didomîne ku li ji sedî 20’ê xebatên pînekirinê pêk hatiye. Mesrefa giştî ya vê projeyê milyonek û 622 hezar dolar e.

Şaredariyê 4 wesayîtên nû ji bo paqijiyê peyda kirine ku hiştiye kar û barên paqijiyê baştir bibin. Her wiha li taxa Tey û kemberên bakur û rojhilatê bajar kampanyayên paqijkirinê bi rêk û pêk dewam dikin.

Berîvan Umer got: "Tevî zehmetiyan jî me karî piraniya plana xwe ya salane ya 2025`an bi cih bînin, projeya bi rêjeya ji sedî 85 hatine pêkanîn. Me hin zehmetiyên têkildarî peydakirina alavan û hin rewşên giştî kişandin, lê me gelek proje berî dema diyarkirî temam kirin."

Xebatên şaredariyê bi hevkariya saziyên Rêveberiya Xweser pêk tên, bi taybetî Desteya Şaredariyan, Rêveberiya Avê û Desteya Aborî, her wiha komîn jî hevkarên sereke yên projeyan in.

Berîvanê destnîşan kir ku wan hin caran hevkarî bi sektora taybet re kiriye, lê piraniya projeyan di bin çavdêriya rasterast a tîmên teknîk ên şaredariyê têne bicihkirin.

Bi qedandina zêdetirî ji sedî 85`ê plana salane, Şaredariya Gel a Qamişloyê tevî hin astengiyên lojîstîk, ber bi temamkirina projeyên mayî ve diçe.

(k)

ANHA