Rûspî: Divê rê li pêşiya fitneya dewleta Tirk bê girtin

Rûspiyên bajarê Helebê diyar kir ku ji bo ku şaşiyên rejîma Baasê dubare nebin û siberoja Sûriyeyê di destûreke nû de dabîn bibe, divê sûriyeyî yek bin û rê li pêşiya fitneya ku dewleta Tirk dixwaze derxe, bê girtin.

26 kanûn, 2024 07:10

HELEB

MIHEMED EBDO

Îstixbarata dewleta Tirk a dagirker hewl dide fitneyê di navbera pêkhateyan de belav bike, ji bo ku şerê navxweyî li ser bingeha olî û nîjadî berdewam bikin ku li ser siberoja welêt gef e.

Rûspiyên taxên Şêxmeqsûd û Eşrefiye yên Helebê têkildarî mijarê û girîngiya hevgirtina di navbera pêkhateyan de, ji ajansa me re axivîn.

‘PARASTINA SIBEROJA SÛRIEYYÊ JI FITNEYÊ ERKEKE RÛSPIYAN E’

Endamê rêveber ê Meclisa Rûspiyan a taxên Şêxmeqsûd û Eşrefiye yên Helebê Bedran Hemo got: "Sûriye derbasî pêvajoyeke nû bû. Projeya Rêveberiya Xweser beriya 10 sal û heta îro xwe isbat kir. Gelek destkeftî ji her kesî re bi dest xist û di encamê de hevgirtina wan di tevneke civakî de xurttir kir.”

Hemo diyar kir ku bi saya berhemên Rêber Abdullah Ocalan, têgehên biratiya gelan û jiyana hevbeş hatin pêşxistin, lê ev pêşketin ne li gorî aliyên herêmî bû ku dixwazin fitneyê di navbera gelan de belav bikin.

Hemo wiha domand: "Dewleta Tirk a dagirker êrişên herêmên kurdan dike lê wan xwe li gorî şerê gel ê şoreşgerî, diparêzin."

Hemo bal kişand ser rola rûspiyan û got: "Ji bo parastina Sûriyeyê ji şer û fitneyê divê civîn li tevahî herêm û bajarên Sûriyeyê werin lidarxistin. Divê her kes tev li sazkirina destûra nû bibe, ji bo ku maf û nasnameya xwe biparêze û tecrubeya Baasê dubare nebe."

‘DIVÊ ŞAŞIYÊN BAASÊ DI SÛRIYEYA NÛ DE DUBARE NEBIN’

Rûspiyekî êla El Imêrat şêx Îbrahîm Ebo Xoce got: "Divê rêveberiya nû ji rêgeza rejîma berê dûr keve."

Xoca bang li aliyên têkildarî kir ku "tecrubeya sivîl" anku Rêveberiya Xweser û destkeftiyên vê rêveberiyê ji bo afirandina hevgirtinê di nava pêkhateyan de, di ber çavan re derbas bikin.

Xoca projeya Rêveberiya Xweser bi "serkeftî" wesifand ku pêkhateyan dihewîne, bi hev re axa xwe diparêzin.

Xoce hêvî kir ku rêveberiya nû nûnerên Sûriyeyê di sazkirina destûrê de dûr nexe û wiha domand: "Em hêvî dikin tecrubeya Baasê yê desthilateke nijadperest û înkarker meşand, dubare neke. Sûriye ya her kesî ye. Divê ev serdema nû, geşbîn be."

(şx)

ANHA