Roja Zimanê Kurdî li gelek bajaran hat pîrozkirin

Bi sedan şêniyên taxên Şêxmeqsûd û Eşrefiyê yên Helebê Roja Zimanê Kurdî pîroz kir. Şêniyan soza bilindkirina asta têkoşînê ji bo parastina ziman da.

Di serî de endama Koordînasyona Kongra Star Fehîme Hemo diyar kir ku zimanê Kurdî li hember siyaseyên bişaftinê li ber xwe da û got ew yek bi rêya têkoşîn û parastina gelê Kurd ji nasnameyê re pêk hat.

Fehîme Hemo destnîşan kir ku ji bo parastina nasnameyê fedakariyeke mezin hat kirin. Fehîme bang kir ku ji bo parastina ziman û pêşxistina wî têkoşîna xwe mezin bikin û got: "Pêwîst e civata navneteweyî ji bo parastina mafên şêniyên resen ên li deverên dagirkirî di serî de Efrîna dagirkirî destwerdanê bike. Ji ber ku artêşa Tirk a dagirker û çeteyên wê siyasetên înkar û tirkkirina herêmê pêk tînin."

Piştre koma govendê ya Şehîd Cûdî Amanos û komên stranan ên Şehîd Avaşîn Demhat, Şehîd Qehreman Efrîn û ya Şehîd Zozan Yûsif stran pêşkêş kirin.

Şahî bi gerandina govendan bi dawî bû.

Li bajarê Kobanê bi dirûşma "Zimanê gel nasname û rûmeta wî ye" li Qada Şehîd Egîd bi beşdariya bi sedan şênî şahî hat lidarxistin.

Di serî de hevserokê Desteya Perwerde û Fêrkirinê ya kantona Firatê Bekir Cerade Roja Zimanê Kurdî li beşdaran pîroz kir û got: "Di sedsala borî de gelek kiryarên dermirovî ji bo tunekirina nasnameya Kurdî bi taybetî zimanê Kurdî hatin pêkanîn. Li hemberî wê gelek serhildan û şoreşên parastina nasnameya Kurdî li dar ketin."

Cîgira hevseroketiya Meclisa Rêveber a kantona Firatê Mizgîn Xelîl li ser reseniya gelê Kurd li herêmê û hemleyên qirkirinê yên li dijî wî axivî û got: "Bi saya têkoşîna bi dehan rewşenbîr em îro vê rojê pîroz dikin."

Piştre xwendekarên serkeftî yên zimanê Kurdî hatin xelatkirin. Di dawiyê de dîlan hat gerandin.

Li bajarê Hesekê Komeleya Rojava ya Çanda Kurdî bi heman boneyê li Xwaringeha Marbêla ya bajarê Hesekê şahiyek li dar xist.

Di şahiyê de endamên komeleyê, rewşenbîr, akademîsyen û nûnerên partiyên siyasî beşdar bûn.

Di şahiyê de axaftin hatin kirin. Dûre beşdaran nêrîn û fikrên xwe yên der barê çawaniya pêşxistina zimanê Kurdî û hişyarkirina civakê li ser girîngiya wî pêşkêş kirin.

Şahî bi gerandina govendan bi dawî bû.

Li bajarê Reqayê xwendekarên Zanîngeha Şerq a kantona Reqayê çalakiyek li qada zanîngehê li dar xist.

Di şahiyê de mamoste, profesor, xwendekar, hevseroketiya Komîseriya Bilind a Hilbijartinan, Desteya Perwerde û Fêrkirinê ya Rêveberiya Xweser, hevseroketiya Meclisa Rêveber a Rêveberiya Xweser û hevseroketiya Meclisa Rêveber a kantona Reqayê beşdar bûn.

Di şahiyê de peyamên pîrozbahiyê hatin xwendin.

Şahî bi stran û helbestên Kurdî ji aliyê xwendekarên zanîngehê ve hatin pêşkêşkirin.

(mh)

ANHA

KOBANÊ

REQA

HELEB

HESEKÊ