‘QSD`ê derbasî pêvajoyeke nû ya parastina maf û destkeftiyan bû‘

Fermandarê Giştî yê QSD`ê Mazlûm Ebdî 25`ê Tebaxê ragihand ku QSD`ê entegreyî artêşa Sûriyeyê bûye. 

Der barê mijarê de şêniyên Çilaxayê axivîn.

Mihemed Emîn Yûsif bi bîr xist ku QSD`ê bi salan li hemberî çeteyên DAIŞ`ê şer kir û ew têk bir, piştî entegrekirinê QSD`ê derbasî pêvajoyeke nû bû, dê deskeftiyên herêmê û mafên hemû pêkhateyên Sûriyeyê û bi taybet mafên siyasî û çandî yên gelê Kurd di çarçoveya Sûriyeyeke pirrengî de biparêze."

Mihemed Emîn Yûsif diyar kir QSD‘ê bedelên mezin dan, herêm û pêkhateyên wê ji teror û fitneyên mezhebî û neteweyî parastin, di heman demê de tevna civakî û aborî ji telankirinê parast. Her wiha destnîşan kir ku QSD‘ê hêza yekane bû ku li hemberî çeteyên DAIŞ‘ê şer kir û destkeftiyên mezin bi dest xistin."

Mihemed Emîn Yûsif anî ziman ku bi saya fedakariya QSD`ê ew bi rûmet dijîn û wiha pê de çû: "Ev cara yekeme di dîroka Sûriyeyê de zimanê kurdî fermî hate naskirin, ev jî bi saya QSD‘ê bû. Em ji destpêke ve bi QSD`ê û gavên wê yên ji bo parastina mafên gelê Kurd û mîsogerkirina wê destûrê de bawer in."

Jina bi navê Etiye Hacî jî destnîşan kir ku QSD‘ê hêza yekane ye ku parastina gelan kir û got: "QSD‘ê hêzeke nîştimanî ye ku tevahî pêkhateyan di nav xwe de digire û tevna civakî ji fitneyan parast."

Etiye Hacî anî ziman ku bi saya QSD‘ê Kurd, Ereb û Suryan bûne yek û têkiliyên wan xurt bû û diyar kir ku bedelên ku şervanên QSD‘ê dane ne tenê ji bo parastina herêmekê an jî pêkhateya Kurd bû, lê ji bo parastina civaka Sûriyeyê û xurtkirina jiyana hevbeş bû.

Etiye Hecî di dawiya axaftina xwe de got: "Guhertina xwezaya pêvajoyê li Sûriyeyê û entegreya QSD‘ê ya nava saziyên dewletê de nayê wateya ku rola wê qediya. QSD‘ê ji têkoşîna leşkerî derbasî têkoşîna mîsogerkirina mafên siyasî û çandî yên tevahî pêkhateyan, di serî jî pêkhateya Kurd bû. Em ê jî di vê pêvajoyê de di aliyê siyasî û qanûnî de tê bikoşin."

Mihemed Emîn Deham Abdullah jî pesnê QSD, YPJ, YPG û tevahî yekîneyên leşkerî yên ku herêm û gelê wê parastin, da û got: "QSD‘ê nebûya, em niha bi azad û rûmet li ser erdê xwe nedijiyan. QSD‘ê li hemberî hewldanên şikandina îrade û hebûna gel xwe kir mertal."

Her wiha anî ziman ku gel, berxwedana şervanên QSD û bedelên ku di mercên herî zehmet de ji bo parastina herêmê û civaka wê dane ji bîr nake.

Mihemed Emîn Abdullah da zanîn ku şênî deyndarên QSD‘ê ne, rola QSD‘ê di aliyê leşkerî û têkoşîna li dijî terorê sînordar nema, lê bibû projeya parastina tevna Sûriyeyê.

Mihemed Emîn Deham Abdullah got, QSD‘ê ku ji şervanên Kurd, Ereb û Suryan pêk tê nimûneya hevgirtina pêkhateyan a li hemberî êrişan bû û wiha dawî li axaftina xwe anî: "Entegreya QSD‘ê di saziya dewleta Sûriyeyê de nayê wateya ku rola wê bi dawî bûye, lê belê ev gav veguhestina ber bi pêvajoyeke nû ve ye ku destkeftiyan biparêze û fedekariyên şehîdan veguherîne garantiyên siyasî û civakî ku di avakirina siberoja gelê Kurd a li ser bingehên edalet, wekhevî û şirîkatiya tevahiya sûriyeyan de bibe alîkar."

 (np)

ANHA