Pirsgirêka avê ya li bajarokekî Reqayê çareser bû

Pirsgirêka avê ya li bajarokê Kidêran ê kantona Reqayê ku bi salan dewam kir, çareser bû.

CIVAK Û JIYAN

23 kanûn, 2025 14:53

REQA

Şêniyên bajarokê Kidêran ê kantona Reqayê bi salan ji ber zêdebûna nifûsê zehmetiyên kêmbûna avê kişandin.

Li ser banga şêniyên bajarokê, Gerînendetiya Avê ya Yekitiya Şaredariyên Kantona Reqayê beriya 2 mehan dest bi avakirina stasyonekê avê kiribû û stasyon berî çend rojan ket xizmetê.

Şaredariyê di çarçoveya xebatê de bîrek kola, pompeyek ku di saetekê de 400 metrekab avê dikişîne danî, her wiha xeta pompekirinê ya 2 kîlometreyî, odeyeke pompkirinê ya taybet û xeteke elektrîkê ji bo xebitandina pompê saz kirin. Bi vê yekê zehmetiyan nêzî 10 hezar kesî bi dawî bûn.

Ji rêveberên Gerînendetiya Avê ya Selhebiyê û berpirsê vê xebatê Zêdan El Nasir diyar kir ku şêniyên Kidêranê ji ber pirsgirêka kêmbûna avê zehmetî dikişandin û da zanîn ku pirsgirêk ji ber zêdebûna nifûsê û kêmbûna ava çemê Firatê zêdetir bû. Ava Firatê li gorî salên berê ji sedî 80 kêm bûye.

El Nasir diyar kir ku pomp ji 10 rojan ve ketiye xizmetê û avê digihîne tevahiya malan. Her wiha îşaret pê kir ku lêçûna stasyonê nêzî 474 hezar dolar bû.

(b)

ANHA