Nivîsgeha Postxaneyê ya Dirbêsiyê hat vekirin

Piştî zêdetirî 10 salan ji girtinê, Nivîsgeha Postxaneyê îro li bajarê Dirbêsiyê, bi armanca pêşkêşkirina xizmetên posteyî, diravî û lojîskî li navenda ragihandin û postxaneyê ya bajêr hat vekirin.

Nûnerên saziyên postxaneyê, endamên Nivîsgeha Rêveber a Parêzgeha Hesekê, Meclisa Xwecih û Meclisa Rêveber a Şaredariya Gel a Dirbêsiyê di vekirina nivîsgehê de amade bûn.

Rêveberê Bazar û Serokê Daîreya Razimaniyê ya Saziya Sûriyeyê ya Postxaneyê  û nûnerê postxaneyên herêma rojhilat Enes Mihemed Wecîh El Serîfî diyar kir ku armanca vekirina postexaneyê ew e ku barê welatiyan ê çûn û hatina nivîsgehên li deverên din sivik bikin.

El Serîfî destnîşan kir ku nivîsgeh 3 xizmetên bingehîn; diravî, posteyî û lojîstîk pêşkêş dike û ev agahî dan " Xizmetên diravî wekî dayîna mûçeyên teqawidan, kişandin û emanetan bi rêya bernameya Sham Cash, peydakirina xizmetên Syriatel û MTN û hêsankirina dravdana xwendinê ji bo xwendekarên zanîngehê ne. Xizmetên posteyê ji veguhestina name, pere û pakêtan di navbera parêzgehên Sûriyeyê de pêk tê. Der barê xizmetên lojîstîkî de jî postexane dikare pakêtan veguhêze welatên din û ji welatên din wergire bi şertê ku giraniya pakêtê ji 30 kîlogramî derbas nebe."

(bb)