Li Şedadê jî krîza avê

Bi hatina werza havînê re, krîzeke mezin a peydakirina avê vexwarinê li bajarê Şedadê yê başûrê kantona Cizîrê rû dide. Her wiha ji ber lewaziya binesaziyê û şorbûna ava bîran, ev krîz hîn kûrtir û girantir dibe. Di encamê de jî şênî bi zehmetiyên rojane yên giran re rû bi rû ne, gefan li ewlehiya wan a avê dixwe û barê debarê girantir dike.

ZEHMETIYÊN ROJANE Û BILINDBÛNA BIHAYAN

Girêdayî mijarê, şêniyê ji gundê Becdelî yê gundewarê Şedadê Mecid El Dexîl li ser êşên rojane yên şênî pê re rû bi rû ne axivî û got: "Tevî ku Şaredariya Gel tanker erkdar kirine, lê belê ava heyî ji bo pêdiviyên şêniyan têrê nake."

El Dexîl wiha domand: "Bihayê kirîna 5 bermîl av ji tankerên Şaredariya Gel nêzî 25 hezar lîreyên Sûriyeyî ye û ev jî ji bo her malbatekê ancax têra du rojan bike."

El Dexîl diyar kir ku kêmbûna belavkirina avê dihêle gele malbat neçar bibin ku avê ji tankerên taybet bikirin ku bihaya her 5 bermîlan di navbera 40 hezarî heta 50 hezarî de ye.

El Dexîl wiha li gotina xwe zêde kir: "Em hêvîdar in ku aliyên têkildarî hejmara tankerên şaredariyê zêde bikin, ji ber ku êdî rewş nayê tehemûlkirin, nemaze bi hatin havînê re û ji ber ku ev pêwîstiyek e nayên paşxistin."

HEWLÊN SIVIKKIRINA KRÎZÊ

Gerînendeyê Beşa Cîbicîkirinê ya Şaredariya Gel a Şedadê Mihemed El Medlol got: "Par me projeya kişandina ava ji çemê Firatê pêk anî. Lê belê li pêşiya wê astengiyên teknîkî û pêkanînê derketin. Ji ber ku pemopkirina avê ji jêdera wê ya sereke qut bû, ku wê hişt qonaxên pêkanîn û pêxistinê asteng bibe."

El Medlol wiha li gotina xwe zêde kir: "Em niha hewl didin bi rêya du stasyonên şêrînkirina avê yên şaredariyê û 3 stasyonên din ên taybet, 27 tankeran li xetên rojhilat û rojavayê bajêr belavkirî ne, pêdiviya şêniyan dabîn bikin. Bi rêya komînan tanker avê belav dikin."

El Medlol anî ziman ku lêçûna şêrînkirina her 5 bermîlên avê di hundirê stasyonê de 13 hezar lîreya Sûriyeyê ye, di heman demê de bi 25 hezaran ji bo welatiyan tê firotin. Ji ber ku lêçûnên veguhastinê û pêxistina tankeran jî heye.

El Medlol got ku ew mezinahiya vê krîzê dizanin û li gorî derfetên heyî dixebitin û got: "Ji bo derbaskirina vê qonaxa dijwar em bi hêvî piştgiriyek mezin bê dayîn."

BANGÊN PÊKANÎNA ÇARESERIYÊN DEMDIRÊJ

Li gorî rewşa li ser erdê, diyar dibe ku eger gavên pêwîst neyên avêtin û çareseriyên demdirêj ji aliyê saziyên berpirs ve neyên pêkanîn, gengazî heye ku krîza avê ya Şedadê kûrtir bibe bi taybetî di lûtketa havînê de.

(mh/fr)

ANHA