Li Qamişloyê projeya kolandina 20 bîrên avê

Ji bo ji Qamişloyê re av zêde were dabînkirin, Şaredariya Gel a bajêr, bi daxuyaniyekê ku ji hêla endazyar Ebdulkerîm Mihemed ê nivîsgeha lêkolînan ve hate xwendin, destpêkirina projeya kolandina 20 bîran li nêzî stasyona avê ya Hilêliyê ragihand. Wê lêçûna vê projeyê nêzî 2 milyon û 850 hezar û 889 dolar be.

Mihemed diyar kir ku armanca projeyê ewlehiya avê ya herêmê were bipêşxistin û mîqdara avê tê ya ji bo stasyonên pompekirinê zêde bibe. Ev jî îstîqrareke xebata wê stasyonê, peydakirina pêdiviyên torê û zêdebûna mezaxtina şêniyan misoger dike.

Mihemed destnîşan kir ku wê mîqdarê avê li gorî taybetmendiyên cîhanê yên para her kesekî/ê, li gorî şert û mercên tenduristî yên cîhanê, were belavkirin.

Mihemed aşkera kir ku li gorî planê, wê 12 bîr li hawiza stasyona Hilêliyê, 2 bîr li stasyona Ceqceq û 6 bîr li beşa rojhilatê bajêr, bi kûrahiya di navbera 325 û 425 metreyî de werin kolandin. Ev yek wê li gorî lêkolînên jeolojîk ji bo pêkanîna hilberîna bilind a her bîrekê ji avê, pêk bê.

Têkildarî ka wê proje pirsgirêka avê ya li Qamişloyê bi dawî bike yan na Mihemed got: "Pêşbîn e hilberîna avê bi rêjeya 75 metrekup di her saetekê de ji bo her bîrekê, be. Anku ji bo 20 bîran wê di saetê de hezar û 500 metrekup avê were derxistin û wê ev av bigihîne stasyonên pompekirinê ku avê li taxên giştî belav bikin."

Mihemed anî ziman ku dema pêkanîna projeyê bi qasî 270 rojan tê texmînkirin. Ji bo misogerkirina serkeftina projeyê û bidestxistina hilberîna baştir, alavên endazyarî û jeolojîk ên herî pêşketî tevî karkerên xwedî pisporî dixebitin.

Şaredariyê 2 bîrên destpêkê li hawiza stasyona Hilêliyê kolandin û wê kolandina bîrên din jî li ser 4 koman were dabeşkirin.

Der heqê taybetmendiyên pîşeyî yên ji bo kolandina bîran tên bikaranîn de Mihemed anî ziman ku wê av li gorî taybetmendiyên tenduristiyê yên cîhanê û para her ferdekî/ê were parvekirin. Çavdêriya wê komîteyê jî ji gelek pisporiyan e. Wê avê beriya ku bigihîne welatiyan di parzûnkirin û paqijkirinê re derbas bibe.

Halê hazir ji 3 jêderên avî yên sereke; stasyona Hilêliyê, Uwêca û Ceqceq û Bendava Sevan avê li Qamişloyê tê belavkirin.

(ac/fr)

ANHA