Li Qamişlo û Helebê 8`emîn salvegera damezirandina Meclisa Jinan a Sûriyeyê hate pîrozkirin

Meclisa Jinan a Sûriyeyê di salvegera 8'emîn a damezirandina xwe de 2 çalakiyên cuda li bajarê Qamişlo yê kantona Cizîrê û taxa Şêxmeqsûd a bajarê Helebê li dar xistin.

Li bajarê Qamişlo çalakî li hola Birc, bi beşdariya nûnerên Tevgera Hîlala Zêrîn ên Qamişlo û Reqayê, rêxistin û tevgerên jinan, saziyên civaka sivîl, Rêveberiya Xweser a kantonê, jinên ji hemû pêkhateyan û endamên meclisê li dar ket.

Di serî de rêvebera meclisê Suhêr El Senûh îsrara meclisê ya domandina têkoşînê û xurtkirina rola jinan di biryardayînê û avakirina Sûriyeya pêşerojê de teqez kir.

Lêkolera Çînî ya ji Dibistana Lêkolînên Bilind a Zanistên Civakî Yushan Kwang rola meclisê di bilindkirina dengê jinên hemû pêkhateyan de silav kir û teqezî bi girîngiya beşdariya jinan di avakirina Sûriyeya pêşerojê de da.

Di çalakiyê de peyamên pîrozbahiyê ji jinên Rojhilata Navîn û cîhanê hatin xwendin û di peyaman de piştgirî ji meclisê re hat nîşandan.

Piştre helbest û berhemên hunerî li ser têkoşîna jinan û şehîd Jîna Emînî hatin pêşandan.

Her wiha komên hunerî yên ji hemû pêkhateyan govendên folklorî yên Suryanî, Erebî û Ermenî pêşandan.

Li Helebê jî çalakî li hola Cezîrê ya taxa Şêxmeqsûd bi beşdariya nûnerên partiyên siyasî û saziyên sivîl ên Helebê û kesayetên serbixwe yên ji Îdlib, Cerablus û Efrîna dagirkirî li dar ket.

Di serî de rêvebera meclisê Rêvan Horo li ser rola meclisê di guhartina rêya tevgera jinan û yekkirina jinan de axivî.

Endama Koordînasyona Meclisa Jinan a Sûriyeyê Gulan Silêman diyar kir ku meclis peyameke wiha ragihand ku jin dikarin jiyanê biafirînin.

Nûnera meclisê li Îdlibê Xedîcd Şeqrûr jî salvegera 8'emîn a damezirandina meclisê li hemû jinên têkoşer pîroz kir.

Di dawiya çalakiyê de berhemên hunerî ji aliyê endamên Tevgera Hîlala Zêrîn ve hatin pêşandan.

(mh/şx)

ANHA

HELEB

Qamişlo