Li Qamişlo meşa li dijî Komploya Navneteweyî

Bi armanca şermezarkirina Komploya Navneteweyî ya li ser Rêber Abdullah Ocalan ku di 9’ê Cotmeha sala 1998’an de pêk hat, şêniyên kantona Cizîrê ya Bakur û Rojhilatê Sûriyeyê meşeke girseyî li dar xist.

Bi dirûşma “Ji Rêber Abdullah Ocalan re azadî, pirsgirêka Kurd re çareserî” şêniyên bajêr bi beşdariya dezgeh û saziyên Rêveberiya Xweseriya Demokratîk, tevger û rêxistinên jinan, saziyên civaka sivîl, partiyên siyasî, malbatên şehîdan û pêşengên êl û eşîran meşiyan.

Meşê ji Çerxerêya Osman Sebrî ya Qamişloyê dest pê kir û heya pêşiya Navenda Mihemed Şêxo ya Çand û Hunerê dewam kir. Piştî rêzgirtinê endamê Desteya Serokatiya Partiya Yekîtiya Demokratîk Aldar Xelîl û endama Koordînasyona Kongra Star Şîraz Hemo axivîn.

Aldar Xelîl bal kişand ser komploya 26 salan û diyar kir: “Di sala 27’an de bi rêya komployê hebûna gelê me û rêberê me hedef digirin.”

Aldar Xelîl wiha got: "Li Îmraliyê li dijî komplogeran berxwedaneke dîrokî tê meşandin û ji bo pûçkirina bandora vê komployê, li hemû qadên têkoşînê yên li Kurdistanê û derveyî wê têkoşînek heye, berxwedaneke dîrokî didome.”

Şîraz Hemo jî di destpêka axaftina xwe de berxwedana dîrokî ya Rêber Abdullah Ocalan û şervanên azadiyê yên di çeperên şer de li ber xwe didin, silav kir û wiha pê de çû: “Her qîrînek û her bihosteke vê axê berxwedana zarokên vî welatî ya dîrokî dibêje. Îro salvegera komployê ye, di vê rojê de hêzên hegemon biryara çêkirina sîstema Rojhilata Navîn a nû dan. Bi hincetên cuda dest bi girtin û çewisandina zanistê kirin, zanista ku dê Rojhilata Navîn bi pêş bixe û azad bike.”

‘HÊZA GELÊN DEMOKRAT NAYÊ ŞIKANDIN’

Şîraz Hemo di berdewama axaftina xwe de bal kişand ser sîstema Bakur û Rojhilatê Sûriyeyê ya li dijî hegemonyayê û wiha anî ziman: “Di dirêjahiya salan de her dem hewl dan hêza gelan bişikînin, jinan kole bihêlin lê tu carî nikarin bigihêjin serî. Çi qas dijmin hovîtiya xwe berdewam bikin jî ew ê nekarin hêza gelan, jiyana hevbeş û demokrasiyê têk bibin. Bê guman sîstema li Bakur û Rojhilatê Sûriyeyê mînaka herî berbiçav e. Ev hevgirtina pêkhateyan e ku ji bo desthilatdariya wan xetere ye.”

Meş bi dirûşmên “Bijî Serok Apo, Bê Serok Jiyan Nabe” bi dawî bû.