Li Qamişlo, Girkê Legê û Amûdê alîkarî li koçberan tên belavkirin

Komîteyên belavkariyê bi rêya komînan alîkarî li koçberan belav dikin û amûrên tenduristiyê dan nexweşxaneya Gel a Qamişloyê.

CIVAK Û JIYAN

2 sibat, 2026 16:57

QAMIŞLO

Di çarçoveya hewldanên mirovî û sivikkirina bar û zehmetiyên koçberan di vê zivistanê de saziyên xêrxwaziyê belavkirina alîkariyên mirovî li koçberan didomînin.

Komîteyên belavkariyê bi rêya komînan alîkarî li malbatên koçber ên li malan bi cih bûne, belav kirin.

Di pêvajoya destpêkê de alîkarî li koçberên li dibistan û mizgeftan dimînin hatin belavkirin, niha jî li malbatên di malan de bi cih bûne, tên belavkirin.

Heyva Sor a Kurdistanê bi Heyva Sor a Kurd a Kurd hemahengî û ji bo Nexweşxaneya Gel a Qamişlo cîhaz rêkirin.

Ev alîkarî ji aliyê rêxistin û saziyên xêrxwaz ên Başûrê Kurdistanê, gelê Rojava û Ewropa ve ji bo Rojava hatin rêkrin. Ev alîkarî li ser koçberên Efrîn û Şehba yên ji Tebqa û Reqayê bi darê zorê hatin koçber kirin, têne belavkirin.

Li gorî agahiyên me ji çavkaniyên Heyva Sor a Kurd girtin wê Saziya Kerkûk a Xwêrxaz cara duyem alîkarî ku 15 barhilgir in derbasî Rojavayê Kurdistanê bikin. Heman çavkaniyan diyar kirin ku ji destpêka êrişan ve 500 barhilgir weke alîkarî gihîştine Rojavayê Kurdistanê.

GIRKÊ LEGÊ

Di çarçoveya hewldanên mirovî yên bi armanca piştgiriya malbatên koçber, Dezgeha Xêrxwaziyê ya Barzanî bi hevkariya Renc Rûdaw, bi koordînasyona Heyva Sor a Kurd alîkarî li malbatên koçber ên li bajarê Girkê Legê û gudewarê wê bi cih bûne hatin belavkirin.

Li koçberan betan, isfinc, xalîçe, nan, qutiyên xwarinê weke penêr, kartol û hinar hatin belavkirin.

AMÛDÊ

Girêdayî mijarê li bajarê Amûdê jî destpêşxerêyên bi hevkariya jinan, endamên Kongra Star, Heyva Sor a Kurd, hejmarek saziyên sivîl û mirovî yên li bajêr kar dikin, rojane xwarinê çêdikin, li koçberên li navendên demkî belav dikin.

Ev alîkariyên li malbatên koçber tên belavkirin, bi armanca sivikkirina zehmetiyên wan ên jiyanê ye.

(bb-fr)

ANHA