Li Dêrazorê belavkirina êmê sewalan dest pê kir

Li kantona Dêrazorê û deverên din ên Bakur û Rojhilatê Sûriyeyê ji ber kêmbûna baranê hişkesalî çêbûyê ku bandorê li qada sewalvaniyê jî dike.

Komîteya Çandinî û Berhemên Sewalan a Kantona Dêrazorê li gorî derfetan destekê dide xwediyê sewalan. Komîteyê ku demek berê serjimariyeke giştî ya sewalan kiribû, êm li xwediyên wan belav dike.

Serokê Nivîsgeha Kar û Barên Çandiniyê ya Komîteya Çandinî û Berhemên Sewalan, Îsamîl Ehmed der barê mijarê de diyar kir ku xebatên serjimariyê 3 mehan (ji Kanûna 2024’an heya Sibata 2025’an) dewam kir û got li 4 herêmên kantonê, her wiha 7 gundên girêdayî wan sewal (pez) hatin hejmartin.

Îsmaîl Ehmed anî ziman li gorî serjimariyê, li kantona Dêrazorê 3 milyon û 200 hezar serî pez hene û wiha  domand: "Komîteyê 2 hezar û 867 ton nexal (kapek) li xwediyên hêştir, pez û çêlekan belav kir."

Ehmed da zanîn ku ji bo her seriyek pez 4 kîlogram, ji her çêlek û hespekî re 20 kîlogram hat belavkirin û diyar kir ku wan giraniya piştevaniyê da xwediyên sewalan ên li herêmên çolistan.

Îsmaîl Ehmed destnîşan kir ku li aşan û Şîrketa Pêşxistina Çandiniyê kîloyeke kapek bi 2 hezar û 500 lîreyên Sûriyeyê ye, lê li sûkên reş bi 3 hezar û 500 lîreyan e.

Îsamîl Ehmed hêvî kir ku Rêveberiya Xweser miqdara êm ji bo xwendiyên sewalan zêdetir bike.

Komîteya Berhemên Sewalvaniyê ya Meclisa Aborî û Çandinî ya Kantona Dêrazorê dê di dema pêş de dest bi hejmartina çêlek û hêştiran bike.

(bb)

ANHA